भांगरभूंय | प्रतिनिधी
श्री महालसा नारायणी विद्यालयाची धोशणा
भांगरभूंय । प्रतिनिधी
वाळपयः वेर्णेंच्या श्री महालसा नारायणी माध्यमीक विद्यालयान यत्ता पांचवेच्या विद्यार्थ्यांचेर शाळेच्या पयल्याच दिसा पर्यावरणीय संस्कार रुजयले आनी 5 जून हो संवसारीक पर्यावरण दीस खऱ्या अर्थान मनयलो. भुरग्यां मदीं नैतीक संस्काराचें बीं रुजयतना तांचेर पर्यावरणीय संस्कार जावचे हे खातीर शिक्षकांनी यत्ता पांचवेंत प्रवेश घेतिल्ल्या दरेका विद्यार्थ्याक कपड्याची पोती दिवन ‘म्हाका नाका प्लास्टीक’ संकल्पना चालीक लायली.
ह्या वेळार विद्यालयाची ज्येश्ठ शिक्षिका पुनम शेटकार, मयुरी नायक आनी सावनी दांडेकार हांणी विद्यार्थ्यांक उवाळ्ळे. जाल्यार शिक्षक ओंकार तळावलीकार, मयूर दळवी, दीक्षित नायक आनी विठ्ठल शेळके हांणी विद्यार्थ्यांक कपड्याच्यो पोतयो वाटल्यो.
आमच्या विद्यालयाचे शिक्षण संस्थेचे पदाधिकारी सदांच आमकां आमच्या विद्यार्थ्यांचेर बरे संस्कार घडोवचे खातीर उर्बा दिता. तशेंच नवे नवे उपक्रम चलोवपा खातीर मोलादीक योगदान दिता. ताका लागून अशे नवे नवे उपक्रम चालीक लावपाक आमकां मजत जाता, अशें पुनम शेटकार हांणी सांगलें.
विठ्ठल शेळके हांणी संवसारीक पर्यावरण दिसाचें म्हत्व पटोवन दिलें. तेचवरी कपड्यांच्यो पोतयो उपलब्ध करून दिल्ल्या सेन्सीबल अर्थ आनी विवेकानंद पर्यावरण जागृती फौजेचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
