भांगरभूंय | प्रतिनिधी
पणजीः म्हाका घर वापसीची गरज ना. घरांतल्यान भायर सरलो. पूण, हांव हेर घरांनी गेलो ना. आदले मुख्यमंत्री लक्ष्मीकांत पार्सेकार हांणी आपल्या फुडाराच्या राजकी मार्गा संबंदी योग्य वेळार योग्य निर्णय घेतलों अशें स्पश्ट केलें.
आदले प्रधानमंत्री अटल बिहारी वाजपेयी हांच्या जल्मशती वर्सुकीं निमतान सोमारा पणजेंत गोंय भाजपान आयोजीत केल्ल्या कार्यावळीक हाजीर रावले उपरांत पत्रकारां कडेन ते उलयताले. विधानसभा वेंचणूक जावपाक दोन वर्सां उरल्यात. देखून तुमी परत घरवापसी करतले काय अशें पत्रकारांनी विचारलें तेन्ना तांणी म्हणलें, “म्हाका घरा परतुपाची गरज ना.” घरांतल्यान भायर सरलो, पूण दुसऱ्या पक्षांत गेलो ना. देखून घरा परतुपाचो प्रस्न उप्रासना अशें तांणी सांगलें.
अटल बिहारी वाजपेयी हे देशाचे एक व्हड फुडारी आशिल्ले. तांकां लागूनच आमी विश्वाची निर्मिती करपाक पावले. जंय जंय तांचो विशय येता थंय सगळी वेदना कुशीक पडटा. तांचे खातीर हे कार्यावळीक आपूण हाजीर आशिल्ल्याचेय उल्लेख पार्सेकार हांणी सांगलें.
मजगतीं, दामू नायक हांणी गोंय प्रदेशाध्यक्षपद घेतले उपरांत पक्ष सोडून गेल्ल्या फुडाऱ्यांक परत हाडपा खातीर आनी पक्षा पासून पयस आशिल्ल्या फुडाऱ्यांक सक्रिय करपा खातीर तांणी पावलां मारपाक सुरू केल्यांत. देखून दामू हे लक्ष्मीकांत पार्सेकारांकूय भाजपांत परत हाडटले असो विस्वास पक्ष कार्यकर्ते उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
