भांगरभूंय | प्रतिनिधी
पणजी : म्हस रस्त्यार आडवी येतकच एसटी बशीक आपटता आनी मुखार शेतकार, बस ड्रायव्हर, प्रवाशां मदीं बरोचवेळ बोवाळ चलता….. पु. ल. देशपांडे हांची ‘म्हैस’ ही विनोदी कथा मुळांतूच वाचपाची. अशीच एक म्हस ताळगांवां बोवाळाक जापसालदार थारल्या. पणजे पुलिशेंत ही कागाळ पावल्या. पुलीस स्टेशनांत कागाळदार सदांच येतात. मात शेनवारा दनपारां एक म्हस आयली. म्हणल्यार आपूण जावन येवंक ना. तिका ताळगांवांच्या शेतकारांनी हाडली. शेताचें लुकसाण करपी हे म्हशीक तांणी धरली आनी पुलीस स्टेशनांत हाडली. शेतकारांनी म्हशीक आनी तिच्या धनयाक ताब्यांत घेवपाची मागणी पुलिसां कडेन केल्या.
हे विशीं चड म्हायती प्रमाण, कानाक टॅग आशिल्ली एक म्हस ताळगांवां शेताचें लुकसाण करताली. म्हशीन शेतांतलें पीक खाल्लेंच, वांगडा थंय लायिल्लें उदकाचें पायपूय मोडून उडयलें. हाका लागून आमचें सुमार 6 लाख रुपयांचें लुकसाण जालें. हे विशीं आमी पणजे पुलिशेंत कागाळ केल्ली. मात तांणी अजूनय कसलीच कारवाय करूंक ना, अशें नेथन डिसोझा ह्या थळाव्या शेतकारान सांगलें.
शुक्रारा रातीं आमीच हे म्हशीक धरली. हे म्हशीच्या कानाक टॅग आसा. हाचो अर्थ तिका धनी आसा. पुलिसांनी टॅगा वयल्यान तिच्या धनयाक सोदून काडचें आनी आमकां आमची लुकसाण भरपाय दिवची. म्हशीच्या शेणाची न्यायवैद्यक चांचणी केल्यार तिणें काल कितें खाल्लां हेंय समजपाक शकता. फाटल्या वर्साय अशेंच घडिल्लें. ह्यो गजाली कायमच्यो बंद जावपाक जाय अशी मागणी डिसोझा हांणी ह्या वेळार केली. सेसील रॉड्रीग्स हांणी सांगलें, ताळगांवच्या दरेके ग्रामसबेंत आमी हेडग्यां गोरवांचो विशय काडटात. तांकां लागून शेतकारांचें लुकसाण जाताच, ते भायर रस्त्याचेरूय अपघात जातात. पूण पंचायत हे बाबतींत गंभीर ना. पंचायतीक हेडग्यां गोरवां खातीर गोठो बांदपाक जमना जाल्यार तो आमी बांदतात. सध्या पुलिसांनी म्हस ताब्यांत घेवन तिका दिवचलच्या सरकारी केंद्रांत धाडल्या. ही कारवाय आदीं जाल्ली जाल्यार लुकसाण जावचें नाशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
