म्हयनो जालो, पुलीस निरिक्षक पावून पावनात

भांगरभूंय | प्रतिनिधी

पणजी : गोंय पुलीस खात्यान सुमार दोन वर्सां सावन एकेच सुवातेर आशिल्ल्या निरिक्षकां सयत हेर निरिक्षक मेळून 50 जाणांचे बदलेचो आदेश 17 एप्रीलाक जारी केल्लो. ह्या आदेशाक म्हयनो जातलो, तरीय सुमार 17 ते 18 निरिक्षक अजून नव्या जाग्यार रुजू जावंक ना. हे संबंदांत वरिश्ठ अधिकाऱ्यांनी सुचोवणी जारी करून कांयच जायना अशें मुखार आयलां.

पुलीस स्थापना मंडळाचे शिफारशी प्रमाण, पुलीस स्टेशना वयले, दर्यादेग पुलीस, सुरक्षा विभाग, येरादारी विभाग, गुन्यांव फांटो, विशेश विभाग, दक्षता खात्याचो भ्रश्टाचार विरोधी विभाग (एबीसी), घुंवळे वखदां विरोधी पंगड (एएनसी), गोंय राखीव दळांत (जीआरपी) तशेंच हेर विभाग मेळून 50 निरक्षकांची एकाच वेळार बदली केल्ली.

मेळिल्ले म्हायती प्रमाण, दुसऱ्या विभागांतल्या निरिक्षकांक पदा वयल्यान मुक्त करूंक नाशिल्ल्यान एक – दोन पुलीस स्टेशनांत नव्या निरिक्षकान ताबो घेवंक ना. तशेंच जारी केल्ल्या आदेशांत पांच निरिक्षक सुटयेर गेल्यात. तातूंतल्या एका निरिक्षकान आदेश येवचे आदींच दीर्घकालीन सुटी घेतिल्ली, जाल्यार एक निरिक्षक नवे सुवातेर रुजू जाले उपरांत सुटयेर गेला. तीन निरिक्षक आदेश आयले उपरांत नवे सुवातेर रुजू जावचे आदींच सुटयेर गेल्यात. तशेंच एक – दोन निरिक्षकांनी नाराजी उक्तावऩ नवे सुवातेर वचपाक न्हयकार दिला. हे खातीर तांणी आपली राजकी वशिलेबाजी लावन नवे सुवातेर बदली करून घेवपाच्यो हालचाली सुरू केल्यात. ताका लागून फुडल्या कांय दिसांनी निरिक्षकांचे नवे बदलीचो आदेश येवपाची शक्यताय आसा. ह्या कारणाक लागून संबंदीत विभागांतल्या निरिक्षकांक वरिश्ठांनी मुक्त करूंक नात.

हे संबंदांत वरिश्ठ अधिकाऱ्यांनी खूब खेपे बिनतारी संदेश जारी करून बदली जाल्ल्या निरिक्षकांक मुक्त करपाक सांगलां. मात संबंदीत विभागांत बदली जाल्ले निरिक्षक रुजू जावंक नाशिल्ल्यान दुसऱ्या विभागांतल्या निरिक्षकांक वरिश्ठ अधिकारी मुक्त करपाक न्हयकार दितात, अशी म्हायती मुखार आयल्या.

बदली जाल्ल्या आदेशा प्रमाण, येरादारी विभागांतले तीन निरिक्षक, जीआरपी आनी सुरक्षा विभागांतले दरेकी दोन निरिक्षक, गुन्यांव फांटो, दर्यादेग पुलीस स्टेशन, बार्देस म्हालांतल्या एका पुलीस स्टेशनांतलो, विशेश विभाग, एसीबी, डीजीपी रिडर आनी दक्षता विभागांतलो दरेकी एक निरिक्षक रुजू जावंक ना. तशेंच दर्यादेग पुलीस स्टेशन, सायबर विभाग, पुलीस प्रशिक्षण स्कूल (पीटीएस), एएनसी आनी येरादारी विभागांतलो दरेकी एक निरिक्षक सुटयेर आसा. पुलीस खात्यान आदेश जारी करून 50 निरिक्षकांच्यो बदल्यो केल्ल्यो. हे मजगतीं, दक्षीम गोंयांतल्या कुडचडें पुलीस स्टेसनार आयपीएस प्रशिक्षणार्थीची प्रभारी म्हूण नेमणूक केल्या. जाल्यार कोलवें पुलीस निरिक्षकाक दक्षीण गोंय राखीव लायनींत नेमला. ताका लागून वयल्या पुलीस स्टेशनाचो अतिरिक्त ताबो दुसऱ्या निरिक्षका कडेन दिला.