भांगरभूंय | प्रतिनिधी
नवी दिल्ली, खबरां संस्था: घरांनी धान्याचेर जावपी खर्च वेगान देंवतूच आसा. पॅत्राॅल- डिझेल, घरगुती गॅस, वीज आनी कपड्यांचे तुळेंत ताचेर उणे पयशे खर्च जातात. तशेंच सॉफ्टड्रींक, टिव्ही, फ्रीज सारकिल्ल्या गजालींचेर बरोच खर्च वाडटा. नॅशनल सर्व्हे सॅम्पल ऑफिसच्या (एनएसएसओ) गांव आनी शारांतल्या हावजहोल्ड कंजंप्शन एक्सपॅन्डीचर सर्व्हे (एचसीईएस) २०२२-२३ त हें स्पश्ट जालां. विशेश म्हळ्यार, २२ वर्सांनी शार आनी गांवांनी जावपी खर्चाचो अंतर वेगान उणें जालें.
सिक्कीमांत सगळ्यांत चड खर्च
सिक्कीमच्या गांवांत ७,७३१ रुपया खर्च जाता, जाल्यार शारांत १२,१०५ रुपया. हो आंकडो देशांत सगळ्यांत चड जावन आसा. छत्तीसगडच्या गांवांत दरेका घरांत जावपी खर्च २,४६६ रुपया जाल्यार शारांतलो ४४८३ रुपया आसा. हो खर्च देशांत सगळ्यांत उणो जावन आसा.
गांवांतल्या आघाडीच्या ५% लोकांचो खर्च म्हयन्याक १०,५०१ रुपया आनी शारांतलो २०,८२४ रुपया आसा. सगळ्यांत गरीब ५% लोकांचो गांवांतलो खर्च १३७३ आनी शारांतलो २,००१ रुपया आसा. १९९९-२००० त गांवांतले लोक आपल्या खर्चाचो ५९.४% भाग खावपा-पिवपाचेर खर्च करतात. २०२२-२३ त तो देंवून ४६.३% जाला. मजगतीं, शारांतल्या लोकांचो खर्च ४८.०६% न देंवून ३९.१७% उरला. गांवांतल्या लोकांचो हेर वस्तूं वयलो खर्च ५३.६२% आनी शारांतल्या लोकांचो खर्च ६०.८३% इतलो आशिल्ल्याचो आंकडो सांगता.
घरांतल्यो वस्तू
टिव्ही- फ्रिज सारकिल्ल्या वस्तूंचेर गांवांत ६.८९% आनी शारांत ७.१७% रक्कम खर्च जाता. १९९९-२०००त हो खर्च गांवांत २.६२% आनी शारांत ३.६१% आशिल्लो.
पॅट्रोल- डिझेल, गॅस- वीज
इंधन- विजेचेर गांवांत खर्च ६.६६% आनी शारांत ६.२६% आसा. १९९९-२००० त गांवांत ७.५२% आनी शारांत ७.७५% आशिल्लो.
कपडे
गांवांत कपड्यांचेर ५.२४% आनी शारांत ४.६४% रक्कम खर्च करता. १९९९-२००० त हो खर्च ६.८५% आनी शारांतलो खर्च ६.०५% इतलो आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
