म्हज्यो गोंयच्यो यादी

भांगरभूंय | प्रतिनिधी

अरुणबाब स्वताक जरी लेखक मानिनात तरी ह्यो यादी वाचतकच तांचे भितरल्या लेखकाची तांक कळून येता. आनी मनाक प्रश्न पडटा, अरुणबाब इतलो तेंप खंय आशिल्ले.

अरुण बाबा नायक हें नांव पयले फावटी हांवें फेसबुका वयल्या कोंकणी स्पिक्स ह्या ग्रुपार वाचलें. तसो हांव खंयच्याच ग्रुपार रावंक सोदिना. कारण ह्या ग्रुपांनी रावन बरें क्रियेटीव अशें कांयच मेळना. सोशियल मिडियाचेर फक्त पळोवंक मेळटा तो दुस्वास. आपलें तोंड लिपोवन टोपण नांवांनी अकावंट उगडप आनी त्या अकावंटा वरवीं दुसऱ्याचेर तुटून पडप, दुसऱ्याक उणें दुणें उलोवप हेंच पळोवंक मेळटा. केन्नाकेन्नाय आमीय तांचे साथी जातात. देखून नाकाच ते ग्रूप म्हणप आनी तांचो सांगात सोडप चड बरें. पूण कोंकणी स्पिक्स ह्या ग्रुपाक जोडलों आनी हांगाच उरलों. हो ग्रूप सोडचो असो विचार लेगीत आयलो ना.
ह्या ग्रुपाचेर कितें तरी सकारात्मक वाचूंक मेळटा. खूबश्यो पोरण्यो यादी नव्यान हांगा वाचूंक मेळटा. गोंय पयलीं कशें आसलें, आमी भुरगेपणांत कितें करताले, कसले खेळ खेळटाले पसून कसली मस्ती करताले तें वाचूंक मेळटा. कोणतरी बरयता आनी आरे, आमीय हेंच केल्लें वा अशेंच करताले म्हणपाची याद जाता. कोण कसले पोस्ट घालतात हाचेर सारकी बरी नदर आशिल्ल्यान हांगां कित्याय कितें घडना आनी बरें तेंच वाचूंक मेळटा. रंजन नायक, मिलींद भरणे, अरुण बाबा नायक, सुदीन कुर्डीकार, तेजश्री प्रभुगांवकार अशे साबार बरोवपी सकारात्मक नदरेंतल्यान बरयतना दिश्टी पडटात.
अरुण बाबा नायकान ह्या ग्रुपांत जायतें लिखाण केलां. तांचें लिखाण आवडिल्ल्यान तांच्या लेखांचें एक पुस्तक येवचें अशी जायत्या जाणांनी तांकां सुचोवणी केल्ली, आनी तांणी मनार घेवन एक पुस्तक उजवाडाक हाडलेंय. ‘म्हज्यो गोंयच्यो यादी’ पुस्तक निकतेंच हातांत पडलें. ब्यात्तर पानांचें सुपुल्लेंच पुस्तक. हातूंत अरुणबाबान बत्तीस यादी पितारल्यात. गोंयच्यो यादी म्हणटकूच पयलीं गोंय कशें आशिल्लें बी म्हणपाच्यो यादी काय असो कोणाचोय समज जावंक येता. तसल्यो यादी हाचे पयलीं कांय जाणांनी बरयल्यात. हरदत्त खांडेपारकारन तर ‘सोनेरी बंध’ ह्या नांवांन तांच्या भुरगेपणांतलें गोंय पितारून आमचे मुखार दवरलां. तेन्ना गोंय कशें आशिल्लें, गोंयचे रस्ते, गोंयच्यो शाळा, येरादारी बी सगल्यो यादी तातूंत मेळटात आनी स्वातंत्र्या पयलींचे गोंय आमचे मुखार उबें जाता.
पूण अरुणबाबांल्यो यादी वेगळ्योच. तांच्या जिवितांत घडिल्ल्यो घटणा. तांकां आयिल्ले अणभव तांणी हांगा गुथल्यात. अरुणबाबांच्या बरोवपांत एक मिश्कीलता आसता. वाचतां वाचतां तुमच्या तोंडार हांसो येवंकूच जाय. देखीक म्हूण सांगचें जाल्यार, अरुणबाब पद्मावती सिनेमा पळोवंक वता. वांगडा घरकान्न आसता आनी थेटरा भायर कोणतरी राजपूत अरुणबाबांक हडकिता. अरुणबाब ताका पळोवन बेगीबेगीन थेटरांत वता. पद्मावती सिनेमा वेळार राजपुतांनी बोवाळ घाल्लो. ते सिनेमाचेर खोशी नासले. सिनेमाचेर बहिश्कार घालपाचो उलो मारिल्लो तांणी. हो राजपूत हांगा कित्याक आयला काय? सिमेमा पळोवंक वता तांचेर हल्लो बी करपाक? अरुणबाबांच्या मनांत भंय निर्माण जाता. सिनेमा सोंपतकूच ते भायर येतात तेन्ना तांकां कळटा हो बेठोच नांवाचो राजपूत. तो अरुणबाबांक म्हापशेंचे शुक्राराचे चणे घेवन आयिल्लो.
अरुणबाबान बरेच सुंदरतायेन हो प्रसंग बरयला. होच न्हय तांगेली दर एक याद अशीच. शाळा सुटली पाटी फुटली, कुत्र्याचो भंय, फॉर एडल्टस ओनली, तीन डिसेंबरची याद, चवथीच्यो फुगेटी खंयचीय याद पळोवची वाचतना तोंडार हांसो येवन तोंड फुलतलेंच. सादी सोंपी भाशा, मेजक्याच उतरांनी कसलोच पाल्हाळ नासतना बरयिल्ल्यो यादी. ह्यो यादी वाचूंक चड वेळ लागना. सुपुल्ल्योच यादी, खिणांत वाचून जाता. खंयूय प्रवासाक बी वतना हातांत धरपा सारकें पुस्तक. कसलेंय टॅन्शन बी आसल्यार सटक करून देंवोंवचे खातीर ह्यो यादी वाचच्यो. तोंडार हांसो फुलतलोच. आतां पळेयात, अरुणबाब गाडी फेरीबोटींत घालता. ताचे मुखार आनीक एकलो आपणाली गाडी घालता. पूण तो मागीर गाडी देंवयतना कटकट नाका म्हूण गाडी घुंवडावन घालता. आतां फेरीबोट धक्यार पावसर हांचे तोंड पळेत कितें बसतलो म्हणून अरुणबाब हातांतलो पेपर मुखा वेल्या हारशाक तेंकोवन पेपर वाचता. मुखार कितें घडटा ….. जाणून घेवंक म्हज्यो गोंयच्यो यादी वाचचेंच पडटलें.
गोंयचें सैम दाखोवपी सुंदर मुखचित्र, घडये गोंयचें सैम एक याद म्हणून उरतलें अशें बी लेखक सुचयना मूं? आमचो विकास तसोच चल्ला न्हय? फाटल्या पानाचेर तांबड्या सुर्लाचें देवूळ. पुस्तक सामकें ओड लावपी जालां. पुस्तकाक माधवबाब बोरकारांची प्रस्तावना लाबल्यांत. प्रस्तावनेंत निमाणें कडेन माधवबाब म्हणटात, ह्या पुस्तकाचो दुसरो वांटो बेगिनूच येवं. हय अरुणबाब हांवूय तेंच मागतां आनी फक्त मागतांच न्हय तर वाट पळेतां.
अरुणबाब स्वताक जरी लेखक मानिनात तरी ह्यो यादी वाचतकच तांचे भितरल्या लेखकाची तांक कळून येता. आनी मनाक प्रश्न पडटा, अरुणबाब इतलो तेंप खंय आशिल्ले. ते मातशे पयलीं कित्याक आयले नात? कांय नजो उसरां येवपी पावस कसो आसता तें कांय वर्सां सावन आमी पळेतात. अरुणबाब फक्त लेखक न्हय तर ते एक बर्‍यांतले समिक्षक. आपणांक आवडिल्लें साहित्य मागीर तें गद्य आसूं वा काव्य, ते नकसूद उतरांनी ताचेर बरयतात. एकेकदां फोन करून आपलें मत सांगतात. आनी हाकाच लागून आपणालें पुस्तक अरुणबाबांच्या हातांत पडलें अशें लेखकाक दिसता.
कोंकणी स्पिक्स ग्रुपाक हांव दिनवासतां. ह्या ग्रुपाक लागून आमकां एक बरो लेखक मेळ्ळो. तांचे लेखन मुखारूय आमकां मेळटलें हाची खात्री आसा. एक लेखक आयज पुस्तक रुपांत आयलो. ह्या ग्रुपार आनीक कांय लेखक आसात, तांचेंय एकठांय जाल्लें साहित्य बेगीन आमच्या हातांत पडचें हीच सदित्सा.

अभयकुमार वेलींगकार
9423884687