भांगरभूंय | प्रतिनिधी
आमी अभ्यासांत बरीं जावचींच, पूण त्याय वांगडा आनीकय कला आमीं आत्मसात करची ह्या मताचो म्हजो बाबा आसा. देखून तो म्हाका अभ्यासा वांगडा हेंर कला मळारूय फुडें काडटा.
म्हजो बाबा हो म्हजो ‘बाबा’ आसलो तरीय आमगेर सगली ताका बाबू म्हणटा. म्हज्या बाबाचे नांव मुकेश वासुदेव प्रियोळकार. बाबा परस जीं कोण धाकटी आसात तीं ताका भैया म्हूण उलो मारतात. म्हजो बाबा सगल्यां परस वेगळो. हांव ताचें सगल्यांत आवडते अशें बाय. म्हजो बाबा म्हाका खुबूच बरो करता. म्हाका जाय जाय तें सगलें तो हाडून दिता. म्हाका केन्नाय किदें जाय आसत जाल्यार तो केन्नाच कांयच कमी करीना. म्हाका सगलें दिवन म्हजे खोशयेंत आपलें सुख मानपी असो हो म्हजो बाबा.
खूब जाण म्हणटात की बाबा कडक आसता. बाबाच चड तापयता म्हूण. पूण म्हजो बाबा शांत. ताचे उलप शांत. ताचो होच सभाव आमकां सगल्यांक चडान चड भावता. ताच्या ह्याच शांत ओडलायण्या सभावाक लागून तो सगल्यांक आवडटा. म्हजी मम्मा जेन्ना म्हाका तापयता तेन्ना हांव रडपाक लागता. म्हाका रडटा ते पळोवन बाबा मागीर म्हाका अशेंय सकयल वचून पासय मारून येवया म्हण्टा. तो म्हाका मागीर खावपाक व्हरता. अशें तरेन म्हाका खोशी करपी म्हजो बाबा म्हज्या दोळ्यांत दूकां येता तेन्नाय म्हाका वोगी करता. खरें म्हटल्यार म्हाका कितेंय दुखले बी जाल्यार म्हजा बाबाक तें चड लागता. इतलो मोग म्हजो बाबा म्हजेर करता.
बाबा खंयूय भोवपाक वा भायर वचूं तो म्हाका आनी म्हजो भाव शुभन हाकाय किदें ना किदें तरी हाडटाच. खासा करून म्हाका तो हाडपाचें विसरना. जरीय म्हजो बाबा म्हजें लाड करता आसलो तरीय केन्ना केन्ना तो म्हाका तापयताय बी. हांव जाणा म्हज्याच बऱ्याक तो तापयता. हांवे केल्ली चुक सुदारची म्हूण तो म्हाका उलयता आसुंये. पूण ताचो तेन्ना मात्सो म्हाका रागूय येता आनी वायटूय दिसता. कारण बाबान तापोवप म्हळ्यार मनाक लागताशें.
म्हजो बाबा मूळांतूच शांत सभावाचो आशिल्ल्यान तो म्हजे कडेन तितलोसो उलयना. पूण उलय नासतनाय आपल्या वावरांतल्यान तो आमकां बरें वायट हाची जाणीव करून दिता. तो वोगी रावनूय आमचे कडेन खूब्ब कितें उलयता. आमकां खूब कितें शिकयता. म्हजा बाबा भितर आशिल्लो आनीक एक सभाव गुण म्हळ्यार म्हजा बाबाक संगीत, खेळ हातूंत विशेश आवड आसा. आमी अभ्यासांत बरीं जावचींच, पूण त्याय वांगडा आनीकय कला आमीं आत्मसात करची ह्या मताचो म्हजो बाबा आसा. देखून तो म्हाका अभ्यासा वांगडा हेंर कला मळारूय फुडें काडटा. ताच्या भितर आशिल्ली अभ्यासू वृत्ती आमकांय नवेनवे शिकपाक फुडें काडटा. कसलेय क्लासीक वचपाक, नवें शिकून घेवपाक आमकां ताचो सदांच हयकार आसता. तो बरें गजाली खातीर म्हाका केन्नाच आडयना.
म्हजा बाबाक संगीताची आवड आसा. ताका गिटार वाजोवपाक खूब आवडटा. तो म्हज्या जल्मदीसाक केक कापताना गिटार वाजयता. वर्सान वर्स म्हजो बर्थडे बरें तरेन मनोवपाचो ताचो यत्न आसता. तो बरें बरें केक म्हजा बर्थडेक हाडटा. म्हाका नवें कपडे आनी जाय जाय तें हाडून दिता. म्हजा बाबाक फोटोग्राफी आनी विडीयो काडप हें खूब्ब आवडटा. ताणे म्हज्या भुरगेंपणांतले खीण ताच्या फोटवांनी सांठोवन दवरल्यांत. तांचो आल्बम करून तें संग्रहीत केल्यात. म्हजा बाबान सांठयल्ली हीं म्हजे खातीरची एक अमुल्य भेट. म्हाका सगलीच बरी करता, पूण म्हजो बाबा म्हाका चड बरो करता. म्हजी खूब अपुरबाय करता. म्हाका फुडें काडटा आनी नवें शिकूंक मजत करता. मम्मा, शुभन आनी घरांतली सगलींच म्हाका बरीं करतात, पूण म्हजो मोगाळ बाबा हो सगळ्यांत ‘बेस्ट’ आनी म्हजे खातीर खाशेलो!
शौर्या मुकेश प्रियोळकार
यत्ता – णववी
खडपाबांद- फोडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
