म्हजे खातीर हें नाताल, तुजे खातीर कितें?

भांगरभूंय | प्रतिनिधी

म्हजे खातीर नाताल म्हळ्यार कितें?  नातलां म्हळ्यार म्हज्या जिवितांत एक नवी वाट, जिविताचें नवेंपण, म्हजो सोडवणदार नव्यान जल्मता आनी तो म्हाकाय नवो करुंक सोदता हाची सुलूस. फाटल्या चार आयतारांची तयारी करून हांव आयच्या दिसा मेरेन पावला. तो जेजूक घेवंक, ताका सांसपूंक आनी तो खरेंच म्हज्या जिवितांत भितर सरला हाची गवायकी दिवंक.  नातलां म्हळ्यार नवे कपडे घालून मिसाक वचप इतलोच अर्थ न्हय तर जेजूक अणभवंक फुडें सरप.  

भ. कार्लोचो भावार्थ

भक्तिवंत कार्लो आकुतीसाक ताच्या वडिलांनी होली लॅन्ड्सांत व्हरूंक येवजिलें.  परम संस्कारांत जाल्ल्या जेजूच्या मिलाग्रिंची वळख पटोवन घेवंचे खातीर ताणें भावार्थाच्यो कांय यात्रा केल्ल्यो. देखून ताका होली लेन्ड्सांत वचूंक जाय आशिल्लें.  त्या दिसांनी ताचे भलायकेचेर मात्सो परिणाम जाल्लो. ताणें म्हणलें, “जेजू 2000 वर्सां आदीं थंय जल्मलो पूण तो आतां हांगाच आसा.” ह्या चिंतनांनी ताणें मिलान शारांतले दर एके इगर्जेक भेट दिली आनी आपलो भावार्थ हालूंक दिलो ना. कार्लो भशेन म्हजें मन जालें पूण म्हाका हॉली लॅन्ड्सांक भेट दिवंक आपोवणें आयलें.  जेजू कोण आनी ताणें मनीसकुळा खातीर खंय आनी कितें केलें हे विशीं जायतेंच अणभवलें.  आयज जंय पॅलेस्तिनी लोक झुजांत सांपडल्यात, त्या वाठारांत हांव भोंवलों आनी जेजून माडयल्ले मातयेचो उमो घेतलो.  जेजू बेथलेहेमांत जल्मलो, जेरुजाल्याक वाडलो आनी पुराय इज्रायल देशाक ताणें धन्य केलो. आयज इज्रायला कडेन जी शक्ती आसा, ती ताचेच कृपेन आसा, ताचेच हिकमतीन आसा. इज्रायल हें हरशीं शांत राश्ट्र पूण ताचे कडेन जी पद्वी आसा ती संवसारांतल्या खंयच्याच राश्ट्रा कडेन ना ही वस्तुस्थिती, कित्याक थंय जेजूचें आसणें आसा, जेजुचो प्रभाव आसा, जेजूची शक्ती आसा.  होच अणभव हांव थयंच्यान घेवन आयलों आनी आयज जें म्हजें जिवीत आसा, तें थयंचे धन्यतायेचेर निंबून आसा.  हे खातीर हांव जेन्ना नातलांची तयार करतां, ती तयारी न्हय फकत म्हजे खातीर बगर म्हजे भोंवतणच्या क्रिस्ती तशेंच हेर धर्मीय लोकां खातीर.  ह्या संवसारांत शांती आसची, सगळ्यांनी एकामेकांक समजून जियेवंचें, एक दुसऱ्याल्यो गरजो समजून घेवंच्यो, गरज तांकां आधार दिवंचो आनी सगळ्यांनी हांसून-खेळून वावुरचें.  कार्लोच्या भावार्थाची गवायकी ही.

नातलां म्हळ्यार…

नातलां म्हळ्यार कुंसवार दिवन खुशालकाय व्यक्त करपाचो वेळ न्हय तर खुशालकाय वांटपाचो वेळ. कुंसवाराच्या नांवान आमी नातालांच्या दिसांनी भौतिक भेटवस्तू दितात पूण ताचे बराबर जाका दिता ताचो हुस्को ना, ताचो मोग ना जाल्यार ह्या भेटवस्तूंक कायंच अर्थ ना. आयच्या काळार आमकां दुस्मान पोसपाची संवंय जाल्या, ती संवंय मोडून काडपाचो हो वेळ.  क्रिस्ती गायनांच्या झेल्यांत एक सोबीत गीत आसा, तूं देवाक भेट घेवन आयलाय आनी तुजो दुस्मान घरा कडेन आसा, जाल्यार ती भेट थंयच दवर आनी पयलीं दुस्माना कडेन सनदान करून यो. दुस्मानकायेक इश्टागतींत बदलून यो. हें करूंक हांव शिकलां. म्हजें नांव इबाडप्यांक हांव दुस्मान मानिनां, घडये ते म्हजे इश्ट जावंक शकनात. लोकां कडेन आशिल्लो दुस्वास विसरपाचो हो वेळ.

नाताल कित्या खातीर?

इंग्लिशींत एक म्हण आसा, “चॅरिटी बिगिन्स ऍट होम.” म्हळ्यार दानधर्म घरांतल्यान सुरू जाता. म्हज्या कुटुंबांत जर शांती ना, जाल्यार हांव ती शांती दूसऱ्याच्या घराब्याक दिवंक शकना. म्हज्या घरांतूच हांव कुटूंब वांगड्यां कडेन दुस्मान जावन जियेतां जाल्यार म्हाका नाताल ना.  ही दुस्मानकाय काबार करून मोग पसरावपा खातीर हें नाताल आसा. घडये नातालांची खुशालकाय समरंभूंक आमी व्हडलें जेवण करतले, तें जेवण जेवतना जर आमीच एकामेका कडेन उलयनात जाल्यार त्या जेवणाक रूच आसची ना. 

सोंपयतना… 

पवित्र पुस्तक अशें सांगता, ‘मनशाक सगळ्यां पातकांतलीं सोडोवंक देवान आपल्या एकल्याच पुताक संवसारांत धाडलो, इतलो ताणें संवसाराचो मोग केलो.’  ह्या मोगांत हांव आनी तूं वांटेकार आसात. जेजू गोरवांच्या गोठ्यांत जल्मलो. आमी ताच्या नांवान व्हडलीं जेवणां करतात. देवाक जर दिसलें आमकां पातकांतलीं सोडोवंचीं, जाल्यार पयलीं आमी पातक वळखुचें पडलें, पातकांतल्यान मोक्ष सोदचो पडलो. हें करूंक आमी शुद्ध जावंया.  कुंसवाराची भेट करतना खऱ्या काळजाचो आनंद वांटुंया. जेजूच्या तत्वांचेर भावार्थ थीर करुंया. ताणें मनशा- मनशा मदें केन्नाच भेद-भाव केलो ना, आमीय तसली वृत्ती आपणावंक शिकुंया. म्हजे खातीर हें नाताल, तुजे खातीर कितें?

विन्सी क्वाद्रूस, 

9822587498