भांगरभूंय | प्रतिनिधी
केंद्रीय गृहमंत्री अमीत शाह हस्तुकीं येवजणेची सुरवात
अर्द्यां परस अदीक गोंयकारांक घर मेळटलें, असो दावो
2452 कोटी रुपयांच्या विवीध 19 प्रकल्पांक बुन्यादी फातर
भांगरभूंय । प्रतिनिधी
पणजी : गोंयांत सुरू जाल्ली ‘म्हजें घर’ येवजण ही फकत एक सरकारी येवजण न्हय, जाल्यार ती भाजप सरकाराची संवेदनशीलता, कुशळ प्रशासन तशेंच प्रधानमंत्री नरेंद्र मोदी हांच्या फुडारपणा खालच्या भाजप सरकारा कडल्यान करतात त्या बदलांची वळख आसा. हाका लागून गोंयांतल्या अर्द्या परस अदीक लोकांक हक्काचें घर मेळटलें, अशें केंद्रीय गृहमंत्री अमीत शाह हांणी सांगलें. शेनवारा श्यामा प्रसाद मुखर्जी स्टेडियमाचेर ‘म्हजें घर’ येवजणेची सुरवात करपाच्या सुवाळ्यांत ते उलयताले. ह्या वेळार 2452 कोटी रुपयांच्या विवीध 19 प्रकल्पांची व्हर्च्युअल पद्दतीन बुन्यादी फातर बसयलो तशेंच उक्तावण लेगीत केलें. कार्यावळीक मुख्यमंत्री डॉ. प्रमोद सावंत, केंद्रीय मंत्री श्रीपाद नायक, खासदार सदानंद शेट तानावडे, प्रदेशाध्यक्ष दामू नायक आनी हेर मंत्री, आमदार हाजीर आशिल्ले.
अमीत शाह हांणी सांगलें, विवीध कायद्यांच्या चपक्यांत सांपडिल्ल्यान गोंयांतलीं खूबशीं घरां नियमीत जायनाशिल्ली. हे संबंदांत न्यायालयान दिल्ल्या एका निर्णयाक लागून हीं घरां मोडपाचो धोको निर्माण जाल्लो. हे खातीर मुख्यमंत्री डॉ. प्रमोद सावंत हांणी ‘म्हजें घर’ ही येवजण हाडली. तातूंतल्या विवीध 11 येवजण्यां वरवीं गोंयांतल्या लोकांक तांची स्वताची घरां तांच्या नांवार करतले. ते खातीर गोंय सरकारान कायद्यांत बदल केले. आतां 2014 आदलीं सरकारी, कोमुनिदाद जमनीं वयलीं घरां नियमीत जातलीं. 20 कलमी कार्यावळी खाला दिल्ल्यो जमनी नांवार करतले. घर दुरुस्तीक 3 दिसांत परवाने, वीज- उदक ह्या सारक्यो मुळावो सुविधा दिवप अश्यो सुविधा लेगीत दिल्यात. घरांक क्लास 1 ऑक्युपंसी मेळ्ळे उपरांत ताचेर रीण घेवपाक मेळटलें. घर धनयाक मरण आयल्यार घर सहजतायेन ताच्या वारसाच्या नांवार करतले.
भाजप गोंय सरकारान एकेच येवजणे खाला गोंयांतल्या सुमार 10 लाख लोकांक घरांचो हक्क दिला. हाची प्रेरणा प्रधानमंत्री नरेंद्र मोदी हांचे कडल्यान मेळ्ळ्या. 2014 त प्रधानमंत्री जाले उपरांत मोदी हांणी सगल्या भाजप आनी एनडीए राज्यांक संदेश दिल्लो. तांणी लोकां मदीं वचून तांच्यो समस्या समजून ताचेर उपाय येवजण क रपाक सांगिल्लें. गरज पडल्यार नवे कायदे हाडून लोकांक तांचें हक्क मेळोवन दिवचें, अशेंय मोदी हांणी सांगिल्लें. आयज लेगीत भाजप सरकारां हेच प्रेरणेन काम करतात. भाजप कालांत देशांतल्या 60 कोटी लोकांक विवीध फायदे उपलब्ध करून दिल्यात. आयज 10 लाख गोंयकारांक थाकाय दिल्ले खातीर आपूण मुख्यमंत्री डॉ. सावंत आनी ताच्या सरकाराचे उपकार मानतात, अशें शाह हांणी सांगलें. मुख्यमंत्री डॉ. प्रमोद सावंत हांणी सांगलें, भाजप सरकार अंत्योदय, ग्रामोदय तत्वाचेर काम करता. भाजपच्या डबल इंजीन सरकाराक लागून फुडल्या 50 वर्सांचो विचार करून गोंयांत नवे प्रकल्प हाडटात. गोंयांत मुळाव्या सुविधांचे उदरगती सयत मनशाची उदरगत लेगीत जाता. ‘म्हजें घर’ हा फक्त एक येवजण नासून ती एक मोहीम आसा. हाका लागून गोंयकाराक ताच्या घराच्या स्वरुपांतलें दायज फुडले पिळगेक दिवपाक मजत जातली. फुडल्या स म्हन्यांत गोंयकारांचीं घरां तांच्या नांवार करतले.
गोंय भारतमातेच्या कपला वयली तिकली
खरगे हांणी एकदां गोंय खूब ल्हान राज्य आशिल्ल्याचें म्हणिल्लें. त्या वेळार आपणे तांकां खंयचेंच राज्य ल्हान वा व्हड नासता, अशें सांगिल्लें. आमचे दिश्टीन गोंयांतले लोक म्हत्वाचे आसात. ल्हान आसलें तरी गोंय ही भारतमातेच्या कपला वयली तिकली आसा, अशें अमीत शाह हांणी सांगलें.
गोंय 20236 मेरेन जातलें पुराय विकसीत
प्रधानमंत्री नरेंद्र मोदी हांणी 2047 मेरेन विकसीत भारताचें सपन पुराय करपाचें थारायलां. आपूण फाटलीं 15 वर्सां गोंयांत येता. गोंयांत जे गतीन उदरगतीचीं कामां जातात तें पळयल्यार गोंय 2035 ते 2036 मेरेनूच पुराय विकसीत जातलें, असो विस्वास अमीत शाह हांणी उक्तायलो.
मनोहर पर्रीकार हांणी गोंयचें नांव पर्जळीत केलें
आयच्या दिसा आपूण सर्गेस्त मनोहर पर्रीकार हांचो उगडास करता. तांणी सादेपणा, प्रामाणीकपणा आनी दुरदर्सीपणा दाखोवन गोंयचें नांव देशभरांत पर्जळीत केलें, अशें अमीत शाह हांणी सांगलें.
स्वदेशी वस्तूंचो वापर करात
केंद्र सरकारान सुमार 395 गजालीं वयली जीएसटी एक तृतियांश उणो केला. हाका लागून सामान्य लोकांक खूब फायदो जातलो. दिवाळीच्या कालांत लोकांनी स्वदेशी वस्तूंचोच वापर करचो. वेपारी तशेंच गिरायकांनी लेगीत स्वदेशीचो आगरो धरचो, अशें अमीत शाह हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
