भांगरभूंय | प्रतिनिधी
पणजी: घरां कायदेशीर करपी ‘म्हजें घर’ येवजणेची म्हायती दिवपा खातीर मुख्यमंत्री शेनवारा सकाळीं साडेधा वरांचेर लोकां कडेन लायव्ह इंटरेक्शन करतले. हे कार्यावळींत हे येवजणेचो लाव कसो घेवचो, तशेंच लोकांचे प्रस्न सोडयतले. लोकांनी थळावी पंचायत आनी पुलिसांनी हजर रावन हे कार्यावळींत वाटेकार जावचें, अशी म्हायती महसूल खात्याचे जोड सचीव सुरेंद्र नायक हांणी दिली.
पर्वरे सचीवालयांत पत्रकार परीशदेंत नायक उलयताले. ह्या वेळार नियोजन आनी सांख्यिकी खात्याचे संचालक विजय सक्सेना हजर आशिल्ले.
१९७२ पयलींचीं आनी कोम्युनिदादींतलीं घरा नियमीत करपा विशींचें विधेयक विधानसभेंत समंत केलां आनी हे विशींची प्रक्रीया समजावन सांगपा खातीर ह्या लायव्ह इंटरेक्शनाचो हेत आसा. म्हजें घर येवजण कशी आसतली. हे येवजणेचो लाव घेवपाची प्रक्रिया कशी करची. अर्ज कशे भरचे हे विशींची म्हायती सादरीकरण करुन दितले, अशें नायक हांणी सांगलें.
हें लायव्ह इंटरेक्शन सगळ्या पंचायत आनी पालिकांनी जातलें. जे लोक हे येवजणे खातीर इत्सुक आसात तांणी वांटेकार जावन हे विशींची म्हायती घेवची. तशेंच जर तांचे कितें प्रस्न आसल्यार तांणी ते ह्या विचारपाक शकतात. तांच्या सगळ्या प्रस्नांची जाप महसुल खात्याचे पंगड दितले, अशी म्हायती नायक हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
