भांगरभूंय | प्रतिनिधी
पणजी : घरां कायदेशीर करपी म्हजें घर येवजणेची म्हायती दिवपा खातीर मुख्यमंत्री शेनवारा थेट संवाद (लायव्ह इंटरेक्शन) सादतले. हे येवजणेचो लाव कसो घेवचो हाची म्हायती दिवन तशेंच लोकांच्या प्रस्नाच्यो जापो हे कार्यावळींत दितले. लोकांनी थळाव्या पंचायतींत आनी पालिकांनी हाजीर रावून हे कार्यावळींत वांटो घेवचो, अशें महसूल खात्याचे जोड सचीव सुरेंद्र नायक हांणी कळयलां.
पर्वरी सचिवालयांत आपयलें पत्रकार परिशदेंत नायक उलयताले. ह्या वेळार नियोजन आनी सांख्यिकी खात्याचे संचालक विजय सक्सेना हाजीर आसले.
म्हजें घर येवजण कशी आसतली? हे येवजणेचो लाव घेवपाची प्रक्रिया कशी करची? अर्ज कशे भरचे हे विशींची म्हायती सादरीकरण करून दितले, अशें नायक हांणी सांगलें.
जमीन महसूल कोड आनी कोड ऑफ कोमुनिदाद विविध सुदारणा घडोवन सरकारी तशेंच कोमुनिदाद सुवातेंत घरां नियमीत करपाच्या विशयाचेर मुख्यमंत्री डॉ. प्रमोद सावंत स्वयंपूर्ण मित्र, पंच, सरंपच, नगसेवक, नगराध्यक्ष आनी थळाव्या वांगडा चर्चा करून गोंयकारांचे रावता त्या घरांचे हक्क राखपा खातीर म्हजें घर उपक्रमा विशीं विस्तारान सांगतले. शेनवारा सकाळीं 10.30 वरांचेर हें इंटरेक्शन सुरू जातलें, अशी म्हायती नायक हांणी दिली.
ते भायर महसूल खात्यान गोंय स्टॅम्प कायद्यांत सुदारणा करून मालमत्ता आनी घरांचें ट्रान्सफर करपा खातीर स्टॅम्प ड्युटीचेर कांय लाव जाहीर केल्यात. तशेंच 20 पॉयंट प्रॉग्राम खाला सरकारान धोरणात्मक निर्णय घेवन ह्या प्रॉग्रामा खाला दिल्ल्या प्लॉटांक श्रेणी 2 चे सुवातेर श्रेणी 1 चें प्रमाणपत्र दिवपाचें थारयलां. तशेंच 1972 पयलींचीं सगळीं घरां नियमीत करपा विशींच्या परिपत्रका विशींची चर्चा जातली, अशें नायक हांणी सांगलें. हें लायव्ह इंटरेक्शन सगळ्या पंचायत आनी पालिकांनी जातलें. जे लोक ह्या येवजणे खातीर इत्सूक आसात तांणी वांटेकार जावन हे येवजणेचे कशे लाव घेवचे आनी हे येवजणे खातीर अर्ज करपाची निमाणी मर्यादा केन्ना हे विशींची म्हायती घेवची. तशेंच जर तांचे कसलेय प्रस्न आसत जाल्यार तांणी ह्या वेळार विचारपाक शकतात. तांच्या सगळ्या प्रस्नांची जाप महसूल खात्याचे कर्मचारी तशेंच मुख्यमंत्री दितले, अशी म्हायती नायक हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
