भांगरभूंय | प्रतिनिधी
1.11 कोटी खर्च करून लेगीत तीन म्हयन्यांत फक्त 1290 अर्ज
भांगरभूंय । प्रतिनिधी
पणजी : मूळ गोंयकारांच्या नांवाचेर घरां जावन हप्पीनेस इंडेक्स वाडचो ह्या उद्देशान सुरू केल्ले ‘म्हजें घर’ येवजणेक फावो त्या प्रमाणांत प्रतिसाद मेळूंक ना, अशें दिसून येता. येवजणेची कार्यवाही सुरू जावन तीन म्हयने जावन गेले. ह्या तीन म्हयन्यांत 1290 अर्ज आयल्यात, अशी म्हायती विधानसभेंतल्यान मेळटा. सरकारान येवजणेचे जायरातींचेर 1.11 कोटी रुपया खर्च केल्यात.
केंद्रीय गृहमंत्री अमीत शाह हांचे हस्तुकीं म्हजे घर येवजणेचो शुभारंभ जाल्लो. सरकारी जमनींतली घरां, कोमुनिदाद जमनींतलीं घरां, 1972 पयलींचीं सर्वेचेर लागिल्लीं बांदकामां/ घरां, वीस कलमी येवजणे सकयलीं घरां, तशेंच खासगी जमनींतलीं अनधिकृत घरां/ बांदकाम नेमीत (अधिकृत) करपा खातीरची ही येवजण आशिल्ली. केंद्रीय गृहमंत्री अमीत शाह हांचे हस्तुकीं येवजणेचो शुभारंभ जाले उपरांत दरेका मतदारसंघांत अर्ज वांटपाच्यो कार्यावळी जाल्यो. मुख्यमंत्री डॉ. प्रमोद सावंत हांणी मतदारसंघाच्या आमदारांचो हाजेरींत कार्यावळींत कांय जाणांक अर्ज वांटले. मामलेदार तशेंच उपजिल्होधिकारी कार्यालयांत अर्ज उपलब्ध आसात. हे येवजणे वरवीं मूळ गोंयकारांची 50 ते 60 हजार घरां अधिकृत (नेमीत) जातलीं असो अदमास मुख्यमंत्र्यान उक्तायल्लो. मात तीन म्हयन्यांत आयिल्ल्या अर्जांचो विचार केलो जाल्यार सरकारान दवरिल्ली मोख साध्य जावपाची शक्यताय दिसना. हे येवजणेची मुजत 1 एप्रील 2026 मेरेन आसा. म्हणल्यार उरिल्ल्या अडेज म्हयन्यांत कितले अर्ज येतात, ताचेर हे येवजणेचे येस थारतलें.
कोमुनिदाद जमनींतलीं घरां नेमीत करपा खातीर फक्त 4 अर्ज
कोमुनिदाद जमनींतलीं घरां अधिकृत करपा खातीर फक्त 4 अर्ज आयल्यात. उत्तर गोंयांत बार्देस म्हालांत 3 जाल्यार दिवचल म्हालांतल्यान 1 अर्ज आयला. बार्देस म्हालांत सेरुला, अस्नोडें आनी शिरसय कोमुनिदादीतल्यान बांदकाम/ घरासंबंदांत दरेकी 1 अर्ज आयला. दिवचल म्हालांतल्या नावेली कोमुनिदादींतल्या बांदकाम/ घरां विशींचो 1 अर्ज आयला.
रूका : दक्षीण, कुशावतीचे तुळेंत उत्तरेंतल्यान चड अर्ज
खासगी जमनींतलीं अनधिकृत घरां/ बांदकामां अधिकृत (नेमीत) करपा खातीर सरकारान अनधिकृत बांदकामा अधिकृत करपी (रूका) कायदो हाडलो. पयलीं जे अर्ज भायर मारल्यात तांकां अर्ज करपाची मेकळीक दिवन पयलींच्या कायद्यांत दुरुस्ती केली. ह्या कायद्या खाला 298 अर्ज आयल्यात, अशी म्हायती विधानसभेंतले जापेंतल्यान मेळटा. उत्तर गोंया सावन 159, दक्षीण गोंय सावन 71 जाल्यार कुशावती जिल्ह्यांतल्यान 68 अर्ज आयल्यात. उत्तर गोंयचो विचार केलो जाल्यार बार्देस 34, पेडणें 52, तिसवाडी 33 आनी पेडणें सावन 52 अर्ज आयल्यात. सत्तरी म्हालांतल्यान एकूय अर्ज येवंक ना.
दक्षीण गोंय सावन मुरगांव म्हालांतल्यान 8, फोंडें म्हालांतल्यान 2 जाल्यार साश्ट म्हालांतल्यान 61 अर्ज आयल्यात. कुशावती जिल्ह्यांतल्यान 68 अर्ज आयल्यात. सांगें 6, काणकोण 7 आनी केपें सावन 55 अर्ज आयल्यात. धारबांदोडें म्हालांतल्यान एकूय अर्ज येवंक ना. हे भायर सरकारी जमनीतलीं घरां नेमीत करपा खातीर 37, जाल्यार 1972 पयलींचीं घरां नेमीत करपा खातीर 527 अर्ज आयल्यात. वीस कलमी कार्यावळी खाला 429 अर्ज आयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
