भांगरभूंय | प्रतिनिधी
मुख्यमंत्री डॉ. प्रमोद सावंत : काणकोणां वांटले ‘म्हजें घर’चे अर्ज
भांगरभूंय । प्रतिनिधी
काणकोण : सांगात, ‘म्हजें घर’ येवजणे कोण कोण विरोध करतात? असो प्रस्न मुख्यमंत्री डॉ. प्रमोद सावंत हांणी काणकोणां रवींद्र भवनांत जमिल्ल्या लोकांक विचारलो. त्या वेळार सभाघरांतल्या लोकांनी काँग्रेस, रेव्हुल्युशनरी पार्टी, गोवा फॉरवर्ड आनी आम आदमी पार्टी अशी जाप दिली. तेन्ना मुख्यमंत्र्यान सांगलें, जे ‘म्हजें घर’ येवजणेक विरोध करतात तांचो उगडास दवरात. ‘म्हजें घर’ येवजणेचे अर्ज वितरीत करपाचे कार्यावळीक ते हाजीर आशिल्ले.
काणकोणच्या रवींद्र भवनांत जाल्ले हे कार्यावळीक मुख्यमंत्र्यां वांगडा काणकोणचे आमदार तशेंच कला आनी संस्कृती मंत्री रमेश तवडकार, नगराध्यक्ष लक्ष्मण पागी, दक्षीण गोंयची जिल्होधिकारी एग्ना किल्टस, अतिरिक्त जिल्होधिकारी रमेश गांवकार, उपजिल्हाधिकारी प्रतापराव नायक गांवकार, विविध पंचायतींचे सरपंच सविता तवडकार, निलेश पागी, वृंदा वेळीप, सेजल गांवकार, निशा च्यारी, जि. पं. वांगडी शोभना वेळीप, शाणू वेळीप आनी हेर मानेस्त हाजीर आशिल्ले. मुख्यमंत्री डॉ. सावंत हांणी दिवली पेटोवन ‘म्हजें घर’ येवजणेचे अर्ज वितरीत करपाचे कार्यावळीची सुरवात केली.
मुख्यमंत्र्यान सांगलें, आमकां कोणाचेंच घर मोडपाचें ना. भाजपचें सरकार हें सामान्य लोकांचें सरकार आसा. हांगा जात, धर्म पळयनात. ह्या वेळार तांणी सरकारी अधिकाऱ्यांक लोकांचो वेळ फुकट घालयनासतना तांकां जे दाखले जाय ते बेगिनात बेगीन दिवपाचे आदेश दिले. ह्या वेळार तांचे हस्तुकीं कोमुनिदाद जमनींतलीं, 20 कलमी कार्यावळी खालचीं घरां दिल्लीं, सरकारी जमनीचेर घरा आशिल्ल्या, अश्या विवीध लोकांक विवीध प्रमाणपत्रां वितरीत केलीं.
निमाणे व्यक्ती मेरेनच्यो सगल्यो गरजो पुराय जावच्यो हे नदरेन भाजप सरकार काम करता. गोंयांतल्या 99 टक्के लोकां कडेन घरांचीं कागदपत्रां नात. ‘म्हजें घर’ येवजणेक लागून अश्या लोकांक थाकाय मेळटली, अशें तवडकार हांणी सांगलें.
आगोंदा कोमुनिदादींतले जमनी वयलीं घरां मोडपाची नोटीस आयिल्ली. अश्यो वेळार ते लोक घुस्पागोंदळांत सांपडिल्ले. आतां हे येवजणेक लागून तांकां राखण मेळटली, अशेंय तवडकार हांणी सांगलें. तेचवरी काणकोणची पडीक शेतां लागवडी खाला हाडटले, अशें तांणी जाहीर केलें. संयुक्त मामलेदार गायत्री देसाय, दिप्ती फळदेसाय रणजिता, प्रिया भिडे, श्रेया कामत, प्रतिक्षा नमशीकार हांणी मानेस्तांक फुलांतुरे भेटयले. शिरीष पै हांणी सुत्रसंचालन केलें जाल्यार उपजिल्होधिकारी प्रतापराव नायक गांवकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
