भांगरभूंय | प्रतिनिधी
पणजी : विवीध तरांच्या जमनी वयलीं बांदकामां नियमीत करपा खातीर सरकारान सुरू केल्ले म्हजें घर येवजणेक गोंयभरांतल्यान बरो प्रतिसाद मेळटा.
ऑक्टोबर 2025 त सुरू केल्ले हे येवजणे खाला विवीध तरांचीं बांदकामां नियमीत करचे खातीर आतां मेरेन 2728 अर्ज आयल्यात. तातूंतले कांय अर्ज निकालांत काडल्यात, जाल्यार हेर अर्जांची प्रक्रिया चालू आसा. वट्ट अर्जांतले सगल्यांत चड 1136 अर्ज हे 1972 आदल्या सर्व्हे प्लॅनाचेर नोंद आशिल्लीं घरां, बांदकामां नियमीत करपा संबंदांत आयल्यात. आतां मेरेन येवजणेच्या एका लाखा परस अदीक अर्जांचें वांटप पुराय जालां.
मेळिल्ले म्हायती प्रमाण, 1972 आदल्या सर्व्हे मॅपा वयलीं घरां नियमीत करचे खातीर आयिल्ल्या 1136 अर्जांतले सगल्यांत च 314 अर्ज पेडणें म्हालांतले आसात, जाल्यार मुरगांव म्हालांतल्यान सगल्यांत उणे 17 अर्ज आयल्यात. येवजणे खाला अवैध बांदकामां नियमीत करून घेवचे कातीर 745 अर्ज आयल्यात. तातूंतले सगल्यांत चड 149 अर्ज साश्ट म्हालांतल्यान आयल्यात. जाल्यार सत्तरींतल्यान 9 अर्ज आयल्यात. 20 कलमी कार्यावळी खाला दिल्ली जमीन नियमीत करून क्लास 1 ऑक्युपन्सी घेवचे खातीर 661 अर्ज दाखल जाल्यात. तातूंत फोंडें म्हालांतल्यान सगल्यांत चड 153 अर्जांचो आस्पाव आसा.
ते भायर सरकारी जमनी वयलीं बांदकामां नियमीत करचे खातीर 144 अर्ज केल्यात. तातूंत दिवचलेचे 51, सत्तरींतले 34 जाल्यार काणकोण, धारबांदोडें आनी केपें म्हालांतल्यान दरेकी एका अर्जाचो आस्पाव आसा. तशेंच कोम्युनिदाद जमनी वयलीं घरां नियमीत करचे खातीर 42 अर्ज आयल्यात. तातूंत उत्तर आनी दक्षीण गोंय जिल्ह्यांतल्या दरेकी 21 अर्जांचो आस्पाव आसा. हे
आदीं येवजणे खातीर अर्ज करपाची निमाणी तारीख 3 एप्रील 2026 अशी आशिल्ली. मात कोमुनिदादी कडल्यान मंजुरी मेळोवप, राबितो दाखलो मेळोवप हाचे खातीर कळाव जाता म्हूण अर्ज प्रलंबीत उरपाची संख्या वाडत आसा. हाचो विचार करून सरकारान हालींच हे येवजणेचो कालावधी आनीक एका वर्सान वाडोवपाचो निर्णय घेतला. हे खातीर येता त्या काळांत अर्जांची संख्या वाडपाची शक्यताय आसा. हाचे आदीं हे येवजणेक विरोधी पक्षांनी विरोध केल्लो. हाका लागून चुकीचो पायंडो पडपाक शकता, असो आरोप तांणी केल्लो. मात मुख्यमंत्री डॉ. प्रमोद सावंत हांणी हे येवजणेचो लाव घेवपी 90 टक्के गोंयकार आसतले, अशें स्पश्ट केल्लें. सरकारान जमीन नियमीत करचे खातीर नेम, अटी आनी शुल्क अधिसुचीत केल्यात. विहीत नमुन्यांत आशिल्लेच अर्जूच स्विकारतात.
20 कलमी खाला 5 हजार लाभार्थी
मेळिल्ले म्हायती प्रमाण, 20 कलमी कार्यावली खाला 5397 जाणांक प्लॉट दिल्ले. तातूंत बार्देस म्हालांत सगल्यांत चड 1174 लाभार्थांचो आस्पाव आशिल्लो. जाल्यार मुरगांवां सगल्यांत उणे 20 प्लॉट दिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
