भांगरभूंय | प्रतिनिधी
मुख्यमंत्री : सदांच गोंयकारां खातीर समर्पीत
भांगरभूंय । प्रतिनिधी
सांखळी : गोंयकारांच्या मुखामळा वयलो हासो तिगोवन दवरचे खातीर वेगवेगळे सकारात्मक बदल केले. तातूंत म्हजें घर, मुंडकारांचें घर आनी शेती संरक्षण कायदो ह्यो तीन गडाली म्हजे खातीर खूब म्हत्वाच्यो आसात. येता त्या काळांत म्हजें घर, मुंडकारांचें घर आनी शेती संरक्षण कायदो ह्या तिनूय गजालींचो गोंयकारांक फायदो जातलो. हीच म्हजी आयच्या दिसा इत्सा आसा. गोंयकारांचो आनंदी निर्देशांक वाडोवचे कातीर आनी गोंया खातीर हांव समर्पीत आसा, अशें मुख्यमंत्री डॉ. प्रमोद सावंत हांणी सांखळे आयोजीत केल्ले संवसार पाडव्याचे कार्यावळींत सांगलें.
सांखळेकारांचें आनी गोंयकारांचो उपाट मोग, आपलेंपण तशेंच भाजप, प्रधानमंत्री नरेंद्र मोदी आनी हेर वरिश्ठ फुडाऱ्यांच्या आशिर्वादान मुख्यमंत्रीपदाची जापसालदारकी सांबाळटा, ताका आयज 7 वर्सां पुराय जातात. गोंयकारांच्या आशिर्वादान गोंयची सेवा करपाचो योग मेळ्ळो. ही सेवा करतना मानवी उदरगत आनी साधनसुविधांची उदरगत करपाक खूब येस आयलें. गोंयकारां विशीं आपणे सदांच समर्पीत भावनेन काम केलां, फुडारांत लेगीत हेंच काम आनी समर्पण चालूच दवरतलों, अशी भावना मुख्यमंत्री डॉ. सावंत हांणी उक्तायली.
मुख्यमंत्री म्हूण काम करतना अंत्योदय तत्वाचेर काम करपाचो निश्चेव आपणे केल्लो. समाजांतल्या निमाण्या घटका मेरेन आपणें पावपाचो यत्न केलो. सरकाराच्यो विवीध येवजण्यो ल्हानांतल्या ल्हान घटका मेरेन पावोवपाचो यत्न केलो. ह्या यत्नांक आतां मेरेन खुबूच येस मेळ्ळां. केंद्र सरकाराचे मजतीन गोंयांत दिव्यांग लोकां खातीर दिव्यांशू केंद्र जीएमसींत सुरू केलां. स्पायनल रिहेब केंद्र बांबोळीच्या केशव सेवा साधनाच्या केंद्रांत सुरू करपाक शकलों. हें एक दुर्मीळ केंद्र आसा. स्पायनल उपचार गोंयांत विनाशुल्क सुरू जाल्यात, हाचें व्हड समाधान आसा, अशें मुख्यमंत्र्यान सांगलें. ह्या वेळार उपस्थीत आशिल्ल्या लोकांनी मुख्यमंत्री डॉ. सावंत हांकां मुख्यमंत्री म्हूण सात वर्सां पुराय केल्ले खातीर परबीं दिलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
