भांगरभूंय | प्रतिनिधी
जेश्ट लेखक तोमाझीन कार्दोज हांचें बरोवप हें अश्या प्रकाराचे लिखाण जावन आसा, जें साहित्य संवसारांतल्या हेर भ्रश्टाचारांच्या विरोधी चळवळीक अपेशी थारायता. तशेंच ताचें लिखाण सामान्यांतल्या सामान्य लोकांच्या काळजाक अळंग स्पर्श करता, अशें म्हळ्यार हांव चुकचो ना. ‘म्हजें गोंय…म्हजे विचार’ (वेंचीक लेख) हें पुस्तक तोमाझीनबाबान बरयलां. अमर प्रकाशनान पुस्तकाची पयली आवृत्ती 2017 वर्सा उजवाडायली. जाल्यार एड्स प्रिंटर्स हांणी तें छापलां. मोल जावन आसा 150 /- रु. हें पुस्तक गोवा कोंकणी अकादमीच्या साहित्य प्रभा येवजणे खाला अर्थीक पालव घेवन उजवाडाक हाडलां.
ह्या पुस्तकाचें खाशेलपण म्हणल्यार सगळे लेख गोंयच्या प्रस्नांचेर आदारीत आसात. हें पुस्तक वाचून माणकुल्या गोंयांत अजूनय कितले प्रस्न सुटावे जावंक नात म्हणपाचे अजाप दिसलें बगर रावना. सगळे मेळून 50 लेख आसात. दरेक लेख समाजांत घडटल्या घडणुकांचेर आटापिल्लो आसा. मुळांत जून 2009 ते सप्टेंबर 2010, पंद्ररा म्हयन्या भितर गोंयांत कसले प्रस्न उबे रावले. ताची जाप सोदपाचो लेखक यत्न करता. खेरीतपणान ह्या पुस्तकाचें खाशेलपण म्हणल्यार कांय लेखांत शिक्षण, राजकारण आनी समाजीक प्रस्नांक लेखकान धाडसान वाचा फोडल्या.
शिक्षण- शिक्षण म्हणल्यार कितें काय? शिक्षणाची व्याख्या कितें काय? संवसारांतल्या खुबश्या विचारवंतांनी आनी शिक्षण तज्ञांनी आपले परीं विचार दिल्यांत. तांचे मदले स्वामी विवेकांनद हांची व्याख्या म्हाका चड प्रभावीत करता. ‘Education is manifestation of the perfection already in man.’
‘दरेका व्यक्ती मदीं जें विचार खतखतांत, तेच विचार भायर काडप म्हणजे शिक्षण. ते भितर कोंबप म्हळ्यार अजिबांत शिक्षण न्हय.’ शिक्षण ह्या विशयाचेर तोमाझीन बाबान स निबंद बरयल्यांत. ते अशे आसात- ‘आमचें शिक्षण आमचो फुडार, शिक्षणाचो दीस ’ एक नियाळ, परिक्षेचे विणें शिक्षण, बारावे वर्गाक एकूच परिक्षा, एटीकेटी आनी शिक्षणाचो दर्जो. शिक्षणांत बदल जावापक जाय. लेखकाचे मतान शिक्षणांत फाटल्या कांय वर्सांन गोंयांत ज्यो कांय घडामोडी घडल्यांत ताचेर पुस्तक उजवाड घालता.
शिक्षण हें गोंयचे उदरगतीचो व्हडांतलो व्हड भाग जावन आसा. खंयचोय समाज जो शिक्षीत आसता. तो समाज सदांच उदरगतीच्या मार्गान नेटान पावलां मारता. आमचें शिक्षण आमचो समाज ह्या लेखांत बरोवपी बरयतात- शिक्षणांतल्यान भुरग्यांचें मानसीक उदरगती बराबर शारिरीक, भावनीक आनी आत्मीक विकास
करूंक वावुरपाची ताकतीकेची गरज आसा. तेच परीं शिक्षकांचो दीस एक नियाळ ह्या लेखांत बरोवपी सांगता- दरेका इश्कोलांत एक प्रयोगशाळेंत कर्माचारी आसूंक जाय आनी (ऑप्शनल) पर्यायी विशय शिकोवपाक प्रशिक्षीत शिक्षक आसूंक जाय. मुल्ल्याधिश्टींत विशयाक फावो ते म्हत्व दिवप गरजेंच जावन आसा. अशें केल्यारुच शिक्षक दीस मनोपांत म्हत्व आसतलें.
परिक्षे विणें शिक्षण ह्या लेखांत बरोवपी बरयता- परिक्षेविणें शिक्षण ही येवजण जैतिवंत जातली जाल्यार पयले सुवातेर एक – एका वर्गांत 25 शिकप्यां परस चड भुरगीं आसूंक फावोना. दुसरे सुवातेर शिक्षकांक ताच्या शिपोवपाच्या कर्तव्यां शिवाय आनीक दुसरो कसलोच वावर दिवप निखालस बंद करपाची गरज आसा. तशेंच बारावेच्या वर्गाक एकूच परिक्षा आसूंक जाय हें धोरण ख-यांनीच बरें जावन आसा, तातूंत मातूय दुबाव ना. पूण तें वेव्हारांत घालचे आदीं. पयलीं सगळ्यां इस्कोलांनी सवलती रचपाची ताकतीकेची गरज आसा. ए.टी.के.टी. आनी शिक्षणाचो दर्जो ह्या लेखांत बरोवपी बरयता- फकत शिक्षणूच न्हय तर शिक्षणाची दिशा आनी आमचो फुडार थारायता. दुस-या तरांनी ज्या दिशेन आमी आमचें शिक्षण व्हरतात ती दिशा आमचो फुडार पर्जळींत करूंक अदीक गरजेचीं आसा असो ते आपले विचार मांडटात.
(फुडें चलता…)
विशाल सिनाय खांडेपारकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
