भांगरभूंय | प्रतिनिधी
अत्याधुनीक अशीं सोंपेंपणां, येरादारी कायदो, सुवेवस्था अशा गजालींचो सादिल्लो प्रचंड ताळमेळ. तातूंत निवळसाण ही तेंगशी आशिल्ली. कोट्यांनी श्रद्धाळूंचें येवप वचप तरीय खंयच घाणीचो लेशूय ना.
नंदादीप, आमचो फॅमिली ग्रूप. आमी प्रयागराजाक वतात, प्लीज एड युवर नेम्स. शिकीनभाईन घाल्ले हे मॅसेजींत हांवें म्हजें नांव एड केलें. तेन्ना खरेंच दिसूंक नाशिल्लें, पूण आज बरयतना हांव खूब खोशी, तृप्त आनी धादोशी आसां.
एकशें चवेचाळीस वर्सांनी येवपी म्हाकुंभ सोशल मिडियाक लागून सामको म्हज्या घरा पाविल्लो. म्हाकुंभा विशीं शास्त्रोक्त माहिती वाचूंक आनी पळोवंक मेळटाली. मुख्यमंत्री, श्री. योगी आदित्यनाथ हांणी साकारिल्ली प्रयागराज नगरी, थंय येवपी साधू संत, अतिमहनीय व्यक्ती, राजकारण, खेळांमळ, चित्रपटसृश्टींतलीं व्यक्तीमत्वां, भक्तगण हे वळेरेंत म्हजोय नंबर लागलो आनी हांव धन्य जालें.
प्रयागराजांत रिक्षेंत आमी भितर सरलीं तेन्ना शास्त्री पुला वयल्यान दिसपी दोळे दिपकावपी तें दृश्य असंख्य लायटींचे खांबे, पयस पयस दिसपी उजवाड, वेगळ्या वेगळ्या संस्थांचे दीपस्तंभ, आपापलें नामकरण केल्लें हिलियमाचे बोमाडे, तंबूंच्यो रांकोच रांको, रस्त्या कुशीकच्यान आपल्यो साटल्यो पोटल्यो माथ्यार, हांडीर घेवन चलपी भावीक, जायत्या संप्रदायांचे अन्नसत्रांचे तंबू, त्या वेळार हांवें जें कितें अणभवलें त्यो भावना उकतावंक उतरां उणीं पडत. बूड सोडात, पूण हांव तें पुण्यनगरींत पावलें, हाचेंच म्हाका खूब अप्रूप दिसलें.
रिक्षाकार थांबलो, फुडलो नामो सांगलो. आमी चलत चलत पूल गांठलो. पुला वयल्यान चलतना सर्गसूख अणभवलें. तिनसांजेचो वेळ आशिल्लो. गर्दी नाच, जशें कितें आमचेच खातीर तो राखून दवरिल्लो. आपलेच गतीन व्हांवपी ती गंगामाई, पुनवेचें नितळ मळब आनी ते सासायेची आभाळमाया. श्रद्धेची परिशीम, तेंगशी आशिल्ली. फुडें चार रस्ते लागले. खरें म्हणल्यार देड म्हयन्या खातिरूच वसयिल्ली ही महाकाय म्हानगरी. कोणाकूच खंयचोच रस्तो पाठ ना, ना सॅक्टराची माहिती, तरीय फक्त विस्वास, उपाट श्रद्धा आनी शासनान दरेके कडेन लायिल्ल्या नकाशांचो आनी दिशादर्शकांचो वापर करीत आनी पुलिसांचें मार्गदर्शन घेत भक्तगण वाट चलताले.
आमीय वाट चलतालीं. सॅक्टर चोविसांत रोखडींच पावलीं. सगली मांडावळ, सोंपेपणां आशिल्ले तंबू. खरेंच दिसनाशिल्लें. तांणी विचारपूस करीत जेवण हाडलें. तान, भूक, न्हिविल्ली तरीय आमी जेवलीं. भायर शेकोटी पेटयिल्ली. आकांताच्या शिंयांत आमी च्या पियेलीं. फांतोडेर बूड मारूंक भायर सरपाचो बेत करीत न्हिदपाचो यत्न केलो.
उपाट उमेद, उमळशीक आनी भक्तीभावान चारांक सुमार आमी भायर सरलीं. रोखडींच पावलीं. लागींच आशिल्लो एरल घांट बोटींग आज णवांक सुरू जातलें म्हणपाचो उदघोश कानार पडलो. मातशें वायट दिसलें, पूण चलत न्हंय गाठली. उपाट गर्दी, पूण थंयूय आमचे खातीर जागो राखीव आशिल्लो. तृप्त मनान गंगेंत पावल घालें. मुजरत घेतिल्ली भगवी ओडणी हांवें माथ्यार घेतिल्ली. आमच्या तेजसान सांगिल्ली विधीयुक्त पुजा, मंत्रोच्चार आनी मागीर श्रद्धेन सगल्यां वांगडां हांवें मारिल्ली बूड. सुलू दिदीन हाडिल्ल्या वातीं-पणटींनी आमी केल्ली पूजा भक्तीभावाची ती परमोच्च शीम आशिल्ली. खूब कितें सादिल्ल्याची भावनाय आमी अणभवली.
प्रयागराज यात्रेक फुडाकार घेतिल्लो म्हजो शिकीनभाई आनी संध्या वयनीक हांव पांयां पडलें. पुराय वाटेर आमकां सांबाळपी दर्शनाचेय हांवें उपकार मानले. मोदीक आनी योगीक मनांतल्यान साश्टांग नमस्कार करीत तांकां येस आंवडेलें. ध्यानीं मनीं नासतना प्रयागराजांतल्या म्हाकुंभांत बूड मारून आमी परत तंबूंत आयलीं. तेन्ना सात वरां जावन धा मिनटां जाल्लीं.
अत्याधुनीक अशीं सोंपेंपणां, येरादारी कायदो, सुवेवस्था अशा गजालींचो सादिल्लो प्रचंड ताळमेळ. तातूंत निवळसाण ही तेंगशी आशिल्ली. कोट्यांनी श्रद्धाळूंचें येवप वचप तरीय खंयच घाणीचो लेशूय ना. आपलें काम प्रामाणीकपणान करपी नितळसाण कर्मचाऱ्यांची, पुलिसांची तोखणाय करता तितली उणीच. हातांत कसलेंच शस्त्र ना. फक्त भाविकां वांगडा सादिल्लो संवाद, दरेकल्याक शांतपणान दिल्ली जाप, थळावे पुलीस, सिआरपीएफ, एसआरपिएफ हांचे जवान वाजेनासतना आपापलें कर्तव्य निभावपी.
अरल घांटाचेर प्रवेश करप मुयेकूय जमचें नाशिल्लें. तरीय थोडें चलून वतकच आमकां बूड घेवन पुजा करूंक मेळ्ळी हें आमचें भाग्य. प्रयागराज पुण्यभुंयेचो निरोप घेतना थंयच राबितो आशिल्ली आमची धुवडी तोनिमा समीर श्रीवास्तव हांणी आमकां दिल्लें जेवण, आमकां मायेची ऊब दिवपी आशिल्लें. आमचे वतीन ताणें घाल्ली ती समरादना आशिल्ली.
भरगच्च गरदी, खूब चलचें पडटा, ट्रफीक जॅम, लुटमार अश्यो जायत्यो वायट खबरो वाचीत, पळयत आसतनाच आमची जाल्ली ही यात्रा. जंय चलूंक जमना थंयच आमी रावुया गो असो उपाय काडपी म्हजी संध्या वयनी, तुका जमलें ना जाल्यार तोनिमा दिदीगेरूच न्हावन यो अशें सांगपी म्हजी भुरगीं अशे हे फाटभुंयेर आमच्या घराब्याची जाल्ली ही यात्रा आनी म्हाकुंभांतली म्हजी बूड; आमच्या जाण्ट्यांची पूर्वपुण्याय आनी आमची देवा वयली श्रद्धा आनी विश्वास म्हणटात तो होच हाचो दिश्टावो म्हाका परतून एकदां जालो.
– चारुशिला दत्तराज देसाय
94211 50739
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
