भांगरभूंय | प्रतिनिधी
कदंब येरादारी महामंडळाचे वेवस्थापकी संचालकाची म्हायती
भांगरभूंय । प्रतिनिधी
पणजीः ‘म्हजी बस’ येवजणेक लागून खाजगी बस आनी कदंब बशी भितर चलपी सर्तीचेर आळो बसतलो. कदंबाची तिकेटींग यंत्रणा, कदंबाचे पास हे सुविधा खाला खाजगी बशी चलतल्यो. बशीं वरवी जायरात करून बस धनयांक 50 टक्के महसुलाचो वांटो मेळटलो, तशेंच इंधन, विमो आनी बसी स्क्रॅप करपाक अनुदान मेळटलें. मडगांव – काणकोण मार्गा वयल्या बस धनयांचो मात्सो विरोध आसा, पूण आमी तांचो गैरसमज पयस केला, अशें कदंब महामंडळाचे वेवस्थापकी संचालक रोहन कासकार हांणी सांगलें.
‘म्हजी बस’ येवजणे विशीं म्हायती दितना कासकार हांणी सांगलें, ही सुदारीत येवजण 15 मे 2025 ह्या दिसा अधिसुचीत जावन ही आतां चालीक लागल्या.
हे येवजणे वरवीं आमकां खाजगी बस धनयांक कदंबाच्या बॅनरा खाला हाडून समन्वयीत बस येरादारी सुरू करपाक जाय. हे येवजणे खाला बस धनयांक दर किलोमिटरा फाटल्यान 3 रुपयांचें अनुदान, दर वर्सा बशीच्या विम्या खातीर 30 हजार रुपया अर्थीक मजत आनी 15 वर्सां मायज जाल्ली 27 सिटर वा चड ही बस स्क्रॅप केले उपरांत 10 लाख अर्थीक मजत दितले. तशेंच बशी वरवीं जायरात करून महसूलाचो 50 टक्के वांटो धनयांक आनी 50 टक्के कदंबाक वतलो, अशी म्हायती कासकार हांणी दिली.
येरादारी संचालनालयान ही येवजण तयार केल्या आनी कदंब म्हामंडळान ती चालीक लायल्या. आमी सगळ्या डेपो वेवस्थपाका वांगडा बसका घेवन दर बसस्टॅण्डांचेर आनी कार्यालयांत मेज घालून हे येवजणेचे अर्ज वांटपाक सुरवात करपाचे निर्देश दिल्यात. आमचे कर्मचारी तांकां येवजणेची म्हायती दितले. ते भायर हे येवजणेचो लाव घेवपा खातीर खूबशें बस धनी फुडें आयल्यात, अशें कासकार हांणी म्हणलें.
हे येवजणेचो फक्त बस धनयांकूच न्हय जाल्यार प्रवाशांकूय लाव मेळटलो. कदंबाची डिजीटल यंत्रणा आसा तिवूय खाजगी बशींनी चालीक लागतली. तिकेटी खातीरचे पीओएस मशीन तांकां मेळटलें तशेंच जो कदंबचो पास आसा तो खाजगी बशींतूय वापरपाक मेळटलो. आमी स्मार्ट कार्ड हाडून तिकेटींग प्रक्रिया पुराय डिजीटायज करपाचो यत्न करतले. तशेंच तिकेट बूक करपाक आनी बस ट्रेक करपाक आमी अॅप हाडपाचे तयारेंत आसात, अशें कासकार हांणी सांगलें.
हे येवजणे खातीर पात्र थारपा खातीर बस 20 वर्सां सकयली आसपाक जाय आनी बशींत ट्रॅकींग मशीन आसपाक जाय. बशीच्या परमिटाचें नुतनीकरण करतना येरादारी खात्यान ट्रॅकींग माक्न बसोवप सक्तीचें केलां. बशींक कदंबाची तिकेटींग पद्दत स्विकारची पडटली आनी ते खातीर आमचे कर्मचारी कडंक्टर आनी चालकांक प्रशिक्षण दितले. तशेंच बशींचें कलर कोडींग जातलें, अशें कासकर हांणी म्हणलें.
सगळ्या कदंब बसस्टॅण्डांचेर हे अर्ज उपलब्ध आसात. हे येवजणे खातीर बस धनयांचो प्रतिसाद वाडट वतलो अशी आस्त आसा. गोंयांत येरादारी खात्या कडेन 800 परस चड बशी नोंद आसात आनी सगळ्यांनी हे येवजणे खाला नोंद जावचे, असो उलो कासकार हांणी मारला. मडगांव – काणकोण मार्गा वयल्या कांय बस धनयांचो विरोध आसा. तांचें म्हणणे आसा, हे येवजणेचे लाव उणे केल्यात. पूण आमी तांकां आस्वासन दिलां, कसलेच लाव उणे करचे नात. आमी तांचे वांगडा बसका घेवन ही येवजण समजावन सांगल्या. पयलीं फक्त काणकोण, मडगांव, फोंडें आनी सांगें हे पायलट तत्वा खाला 57 बशी हे येवजणे खाला चलताल्यो. हे येवजणेचो विस्तार करचे पयलीं आमकां कसल्यो अडचणी येतात तो पळोवपा खातीर आमी चांचणी सुरू केल्ली, अशी म्हायती कासकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
