‘म्हजी बस येवजण’ नव्यान अधिसुचीत

भांगरभूंय | प्रतिनिधी

पणजी : येरादारी खात्यान 2023 वर्सा हाडिल्ली ‘म्हजी बस येवजण’ नव्यान अधिसुचीत केल्या. नवे येवजणेंत खाजगी बसधनयांक आदले परस अदीस सुविधा दिल्यात. हे प्रमाण बस चालकांक प्रती किलोमीटर 3 रुपया अनुदान, विम्यांतलो 50 टक्के निधी तशेंच नवी बस घेवपा खातीर 10 लाख रुपयां मेरेन मजत मेळटली. आदले प्रमाण चालकांक तिकेट विक्रेंतलो वांटो कदंबाक दिवचो पडचोना.

येरादारी खात्यान हालींच अधिसूचीत केल्ले येवजणे प्रमाण गरजेचे परवाने आशिल्ल्या बस चालकांक हे येवजणेचो लाव घेवपाक मेळटलो. येवजणेंत पंदरां वर्सां परस आदली बस चलोवपाक परवानगी दिली. मात येवजणेच्या सुरवातेचीं तीन वर्सां 20 वीस वर्सां मेरेन आदले बसी खातीर परवानगी आसतली. अर्जदार गोंयचे नोंदणीकृत धनी आसप गरजेचें. बस चालकांक तांच्या बसींचेर दाखोवपी जाहिरातींतल्यान मेळपी उत्पन्नाची 50 टक्के रक्कम कदंब महामंडळ प्रशासकी आनी हेर खर्चा खातीर राखून दवरतले.

हे येवजणे खाला कदंबा म्हामंडळाचो स्मार्ट ट्रांझिट पास आनी स्मार्ट ट्रांझिट कार्ड सगल्या बशींनी वैध भाडें म्हणून मान्य करतले. ह्या पास आनी कार्डां वरवीं एकठांय केल्ली रक्कम म्हामंडळान थारायिल्ल्या मार्गदर्शक तत्वां प्रमाण त्या त्या संचालकांक परत दितले. बस धनी, कंडक्टर वा चालक वाहन लॉग बूक राखपाची जबाबदारी घेतले. तांणी दरेके ट्रिपची म्हायती नोंद करप गरजेचें. हातूंत सुटपाचो आनी येवपाचो वेळ, अंतर आनी देखरेखीची गरज आसतली.