भांगरभूंय | प्रतिनिधी
कदंब येरादारी महामंडळाचो वर्धापन दीस उमेदीन
पणजीः म्हजी बस येवजणे खाला नोंद जाल्ल्या खाजगी बस धनयांक आतां मेरेन सरकाराकडल्यान 2 कोटी इतलो लाव मेळ्ळा. म्हजी बस येवजणेचें सरकारी अनुदान वाडोवपाचो प्रस्ताव सरकारान दवरला. देखून हे येवजणे खाला येवपाक बस धनी जितलो कळाव करतले तितलेंच तांचें लुकसाण जातलें, अशें मुख्यमंत्री डॉ. प्रमोद सावंत हांणी म्हणलें.
कदंब येरादारी महामंडळान पणजे बस स्टँडार आपलो 45 वो वर्धापनदीस व्हडा उमेदीन मनयलो. ह्या सुवाळ्याचे मुखेल सोयरे म्हण मुख्यमंत्री उलयताले. ह्या वेळार येरादीरी मंत्री मावीन गुदीन्हो, कदंब येरादारी महामंडळाचे अध्यक्ष उल्हास तुयेंकार, येरादारी खात्याचे संचालक परिमल अभिशेक, कदंब येरादारी महामंडळाचे वेवस्थापकी संचालक रोहन कासकार आनी हेर मानेस्त हजर आशिल्ले.
सरकार म्हजे बस येवजणे खाला धनयांक दर म्हयन्यांक 18 हजार इतले अनुदान दिता. तशेंच फुडाराक हें अनुदान 25 हजार मेरेन वाडोवपाचे विचार करता. तशेंच नवी बस घेवपा खातीर सरकार 10 लाख मेरेनचे अनुदान लेगीत दिता. देखून हाचें ताचें आयकचे परस बस धनयांनी म्हजी बस येवजण आस्पावन घेवची, असो उलो मुख्यमंत्री डॉ. प्रमोद सावंत हांणी मारला.
कदंबचे निवृत्त आनी सेवेंत आशिल्ल्या कर्मचार्यांचे प्रलंबित थकबाकीचो विचार सरकारान सुरु केला. हे विशीं कदंब येरादारी महामंडळाचे अधिकारी सरकाराकडेन फाटपुरवण करता. सरकारान आतां मेरेन 50 टक्के थकबाकी दिल्या आनी उरिल्ली थकबाकी तीन म्हयन्यां भितर दितले, अशें आस्वाासन मुख्यमंत्र्यान दिलें.
26 जानेवारी 26 मेरेन कदंब महामंडळाचीं पुराय यंत्रणां डीजीटल जातलीं. ऍपा वरवीं बसींचें ट्रेकींग जातलें. बस खंय आसा आनी कितले फावटीं भितर पावतली अशी आधुनीक सुविधा प्रवाश्यांक मेळटली, अशी म्हायती येरादारी मंत्री मावीन गुदीन्हो हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
