म्हजी अंदमान भोंवडी

भांगरभूंय | प्रतिनिधी

अंदमान आनी निकोबार जुंव्यांक दिल्ले भेटी विशीं बरयतना म्हजी उमेद म्हाका आडावंक मेळना. अंदमान आनी निकोबार पळोवप म्हजें सपन आशिल्लें आनी निमाणे म्हाका ती संद मेळ्ळी. म्हज्या प्रवासांत म्हाका मेळिल्ले कांय अविश्वसनीय अणभव सांगताना उपाट खोस भोगता.
आमी आमची भोंवडी दाबोळी विमानतळा वयल्यान सुरू केली. इंडिगो एअरलायन्स दाबोळे सावन चेन्नय आनी उपरांत पोर्ट ब्लेअर आतां श्रीविजयपुरम; अंदमान आनी निकोबार जुंव्यांची राजधानी पावलें. विमानतळा वयल्यान भायर सरता म्हणसर उश्ण कटिबंधीय हवेन आनी दर्याच्या आकर्शक वासान म्हाका येवकार दिलो. आमी हॉटेलांत चेक इन केलें आनी आमची भोंवडी सुरु जाली.
त्याच सांजवेळार आमी कॉर्बिन्स कोव बीच आनी मागीर आशियांतल्या सगळ्यांत बऱ्या दर्यादेगांतलो एक अशें मानतात त्या राधानगर दर्यावेळेर गेलीं. थंय पावल दवरता म्हणसर ताची इतली नामना कित्याक आसा तें समजलें. नितळ उदक, पिठो रेंव आनी दर्यादेगे भोंवतणीं आशिल्ली पाचवी चार हें उस्वास घेवपा परस उणें नाशिल्लें. सगळो दीस सुर्या वांगडा, लांब भोंवडी करून आनी सैमाच्या सोबीतकायेक आस्वाद घेवन सारलो.
दुसऱ्या दिसा आमी ‘काला पानी’ ह्या नांवान वळखतात त्या कुकर्मी सेल्युलर जेलाक भेट दिली. ताच्या कॉरिडोरांतल्यान वतना इतिहासाची आनी बलिदानाची खोलायेन जाणविकाय जाली बगर रावली ना. सांजवेळाचो सावंड आनी लायट शो भावनीक रितीन मनभुलोवपी आशिल्लो, आमच्या स्वातंत्र्य झुजाऱ्यांक कितले संघर्श सोंसलेले हाची याद करून दिली.
तिसऱ्या दिसा सगळे जुंव्यांच्या उदकापोंदा आशिल्ल्या संवसारांत भोंवपाचे आशिल्ले. आमी निवळ उदक आनी जिवंत प्रवाळ आशिल्ल्या हॅव्हलॉक जुंव्या कडेन गेले. हांव आनी म्हजी बायल सविता स्नॉर्कलिंग भोंवडेर गेली आनी पृष्ठभागाच्या सकयल आशिल्ल्या सोबीतकायेक लागून तांकां उस्वास घेवपा सारकें दिसलें. रंगीत प्रवाळ निर्मिती, विदेशी नुस्तें आनी सौम्य दर्यांतलें कांसव हांकां लागून एक मोहक दृश्य तयार जाल्ले दिसतालें. तशेंच दर्यांतले जीव आनी प्रवाळ सोदून काडपी अर्द पाणबुडीत बसपाचोय आमी अणभव घेतलो.
चवथ्या दिसा नील जुंव्याचेर याद उरपी प्रवासाक भायर सरलीं. तो एक शांत परादीस आनी थंय निवळ दर्यादेग आसा. भरतपूर दर्यादेगेच्या धव्या रेंवाचेर आमी दीसभर सुशेग दिवन काडलो. जुंव्याची शांतताय खऱ्या अर्थान आत्म्याक बाम आशिल्ली. मागीर सुभाषचंद्र बोस जुंवो म्हण्टात त्या रॉस जुंव्यार आमी गेलीं आनी थंय आमी भग्नावशेश सोदून काडले. तशेंच इश्टागत करपी हरणांची व्हड संख्या आशिल्ल्यान ह्या जुंव्याची नामना आसा, तांकां मुक्तपणान भोंवपाक मेळटा आनी भोंवडेकारांक संवाद सादपाक मेळटा. तशेंच ‘हरणां फुसफुसपी’ म्हणून वळखतात. ते अनुराधा राव हांकां आमी मेळ्ळीं. तिचें हरणां कडेन खाशेलें नातें आसा आनी ती तांचे कडेन उलोवंक शकता आनी तांकां नांवान लेगीत आपोवंक शकता. म्हजी बायल सविता रॉस जुंव्यार आयली ना. मड ज्वालामुखी आशिल्ल्या बाराटांऌग जुंव्यांचेर भेट दिवप तिका चड आवडलें. भूंयरूपांतल्यान चिखलाचे फुगे भायर सरतात अशें दिसता. चुनखडीच्या लेण्यांक भेट दिवन तिका जरवा जमातीचे लोक पळोवंक मेळ्ळे.
अंदमान आनी निकोबार जुंव्यांचेर आनी थंयच्या लोकांच्या उबदारपणाचेर म्हाका मोग जालो. फेरीबोटींतल्यान प्रवास करतना उडपी नुस्तेंय दिसून आयलें.
यादींचो खजिनो घेवन हांव भायर सरलो. अंदमान आनी निकोबार जुंवे आपले अतुलनीय सोबीतकाय, गिरेस्त इतिहास आनी जिवंत दर्यांतले जिणेन म्हजें काळीज जिखून घेतिल्लें. आमची भोंवडी इतली याद उरपा सारकी केल्ले खातीर ट्रॅव्हल बग आनी खास करून दक्षल आनी अनुष्का हांचे उपकार.

जाॅन आगियार
9822159705