म्युच्युअल फंडांत गुंतवणूक करपाचो पर्यय लोकप्रीय

भांगरभूंय | प्रतिनिधी

2025 वर्सा गोंयांतल्यान 4.77 लाख कोटी गुंतवणुकीचें मुल्य

पणजी: फाटल्या कांय वर्सांत म्युच्युअल फंडांत गुंतवणूक करपाचो पर्याय लोकप्रीय थारत आसा. बँक खातें वा हेर परंपरीक पर्यायांतल्या गुंतवणुकी परस म्युच्युअल फंडांतल्यान अदीक परतावो मेळत आसा. वर्स 2025त गोंयांतल्यान म्युच्युअल फंडांत गुंंतवणुकीचे वट्ट मुल्य सुमार 4.77 लाख कोटी रुपया आशिल्लें. हाचोच अर्थ राज्यांतल्यान म्हयन्याक सरासरी 39 हजार कोटी रुपया मुल्य आशिल्ली गुंतवणूक जाल्या.

फाटल्या वर्सा संवसारीक पांवड्या वेलीं झुजां, अमेरिकेन घाल्ले निर्बंध आनी हेर कारणांक लागून म्युच्युअल फंड, शेर बाजारांतले गुंतणुकीचेर थाोडोसो परिणाम जाल्लो. पूण जुलय 2025 उपरांत म्युच्युअल फंडांतले गुंतवणुकींत परतून वाड जाली. गोंयचो विचार करीत जाल्यार 2025 वर्सा सगल्यांत चड 46 हजार 621 कोटी रुपया गुंतवणूक ऑक्टोबर म्हयन्यांत जाल्ली. जाल्यार मार्च म्हयन्यांत सगल्यांत उणी म्हणल्यार 36 हजार कोटी रुपयांची गुंतवणूक जाल्ली.

गोंयांत जुलय उपरांत डिसेंबर मेरेन दरेक म्हयन्यांत 40 हजार कोटी रुपयांची गुंतवणूक जाली. जाल्यार जानेवारी ते जून 2025त हीच गुंतवणूक 36 ते 39 हजार कोटी रुपयांचे मजगतीं आशिल्ली. वयल्या काळांत गोंयांतल्या ग्रोथ/ईक्विटी स्किमींत सगल्यांत चड पयशे गुंथयिल्ले. गोंयांतली प्रती व्यक्ती गुंतवणूक 2.67 लाख रुपयां मेरेन आशिल्ली. प्रती व्यक्ती गुंतवणुकेंत गोंय देशांत आघाडीचेर आशिल्लें. जाल्यार महाराष्ट्र दुसऱ्या स्थानार उरलें. केंद्र शासीत प्रदेशांत दिल्लीतली प्रती व्यक्तीची गुंतवणूक चड आशिल्ली.

राष्ट्रीय शेर बाजाराच्या (एनएससी) अहवाला प्रमाण नोव्हेंबर 2025 अखेरेक राज्यांतल्या 2.70 लाख लोकांनी शेर बाजारांत गुंतवणूक केल्या. नोव्हेंबरांत राज्यांतल्या 2,400 लोकांनी पयलेच फावटी शेर बाजारांत गुंतवणूक केल्या. राज्यांतल्या वट्ट गुंतवणुकदारा पैकीं 33.1 टक्के बायलो आशिल्ल्यो. हाची राष्ट्रीय सरासरी 24.7 टक्के इतली आशिल्ली.