भांगरभूंय | प्रतिनिधी
नवी दिल्ली, खबरां संस्था ः म्युच्युअल फंडांत गुंतवणूक करपी वट्ट गुंतवणूकदारांत बायलांचो वांटो एक चतुर्थांश म्हणल्यार 25% मेरेन वाडला. तेच बरोबर वैयक्तीक गुंतवणुकदारांच्या मालमत्तेंत बायलां गुंतवणुकदारांचो वांटो एक तृतीयांश मेरेन पावला. हाचो अर्थ दादल्यां परस बायलो चड गुंतवणूक करतात.
असोसिएशन ऑफ म्युच्युअल फंड्स इन इंडिया (AMFI) आनी क्रिसिलाच्या अहवाला प्रमाण बायलां गुंतवणूकदारांची वेवस्थापनांतली मालमत्ता मार्च 2019 वर्सा 4.59 लाख कोटी आशिल्ली, जी मार्च 2024 वर्सा दुपेटीन वाडून 11.25 लाख कोटी रुपया जाली.
ब्रोकराच्या मजतीन गुंतवणूक
अहवाला प्रमाण, ब्रोकराच्या मजतीन थेट गुंतवणूक करपाचो ट्रेंडबायलां गुंतवणूकदारांत नेटान वाडत आसा. मार्च 2024 मेरेन तांचे सुमार 21% एयूएम थेट येवजणेंतल्यान आयले. मार्च 2019 वर्सा हो आंकडो 14.20% आशिल्लो.
तरणाट्या बायल गुंतवणूकदारांत हो ट्रेंड सगळ्यांत नेटान चलता. 25-44 वर्सां पिरायेच्या गटांतल्या बायलां मदीं वट्ट एयूएमांत थेट येवजणे वरवीं गुंतवणूक करपाचो वांटो 16% वयल्यान 27.3% मेरेन वाडलो, जाल्यार 58 वर्सां वयल्या तो 13.9% वयल्यान 17.6% मेरेन वाडलो.
म्युच्युअल फंडांत बायलांची गुंतवणूक 11 लाख कोटी रुपया आसा. तांतुतली 25 वर्सां सकयल्या बायलांची गुंतवणूक सगळ्यांत उणी 1.6% आसा.
2019 वर्सा बायलां गुंतवणुकदारांनी केल्ल्या वट्ट गुंतवणुकांतल्यान 5 वर्सां परस चड काळांतल्या होल्डिंगांचो वांटो 8% आशिल्लो, जो मार्च 2024 वर्सा 21% जालो. ह्या काळांत दादल्या गुंतवणुकदारांची गुंतवणूक 8% वयल्यान 20% जाली.
मार्च 2024 वर्सा बायलांच्या वट्ट गुंतवणुकींतल्यान 30% परस चड एसआयपींचो वांटो आशिल्लो. मार्च 2019 ते मार्च 2024 ह्या काळांत तातूंत 319% वाड जाल्या.
बायलां गुंतवणुकदारांच्या एसआयपी खात्यांत डिसेंबर 2020 वर्सा 71.13 लाखांची वाड जावन डिसेंबर 2024 वर्सा 2.63 कोटी जाली. म्हणल्यार खात्यांत 270% वाड जाल्या.
बायलांच्या एसआयपींचो एयूएम डिसेंबर 2020 वर्सा 1.2 लाख कोटी रुपया आशिल्लो तो डिसेंबर 2024 वर्सा सुमार 4.3 लाख कोटी रुपया जालो. म्हणल्यार तांतूत सुमार 4 पटींनी वाड जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
