भांगरभूंय | प्रतिनिधी
भांगरभूंय । पिनाक कल्लोळी
पणजीः फाटल्या कांय वर्सांत पयशे गुंतोवपा खातीर म्युच्युअल फंड हो पर्याय फामाद जाला. अशे गुंतवणुकेंत गोंयच्यो बायलो देशांत आघाडेर आसात. असोसिएशन ऑफ म्युच्युअल फंड्स इन इंडिया (एएमएफआय), क्रिसील आनी एम अॅण्ड आय ह्या तीन संस्थांच्या अहवाला प्रमाण गोंयांतल्या वट्ट म्युच्युअल फंड गुंतवणुकदारां मदल्यो 40 टक्के गुंतवणुकदार ह्यो बायलो आसात. पुराय देशा खातीर हेंच प्रमाण 24 टक्के आसा. हे वळेरेंत दुसऱ्या नंबराचेर मिझोरम आसा. थंयच्या वट्ट गुंतवणुकदारां मदल्यो 39 टक्के बायलो आसात.
https://www.facebook.com/bhaangarbhui/videos/875533467926252
अहवाला प्रमाण डिसेंबर 2023 चे अखेरेक देशभरांतल्यान म्युच्युअल फंडांत सुमार 50 लाख कोटी रुपयांची गुंतवणूक जाल्ली. फाटल्या कांय वर्सांत देशभरांत म्युच्युअल फंडांत महिला गुंतवणुकदारांचें प्रमाण वाडलां. पुराय देशांत 2017 त म्युच्युअल फंडाच्या असेट अंडर मॅनेजमेंटांत (एयूएम) महिला गुंतवणुदारांचें प्रमाण 15.2 टक्के आशिल्लें. डिसेंबर 2023 अखेरेक तें वाडून 20.9 टक्के जाल्लें. जाल्यार विवीध म्युच्युअल फंड फोलियोंत निमशारी वाठारांतल्या बायलांचें प्रमाण हें शारी वाठारां परस चड आसा. ह्या काळांत निमशारी वाठारांत बायलांचें प्रमाण 8 ते 10 टक्क्यांनी वाडलां.
महिला गुंतवणुकदारांचे वळेरेंत मिझोरमा उपरांत सिक्कीमचो नंबर लागता. थंय वट्ट गुंतवणुदादरां मदल्यो 38 टक्के बायलो आसात. ते उपरांत मेघालय (37 टक्के), अरुणाचल प्रदेश आनी नागालँण्ड (दरेकी 36 टक्के), महाराष्ट्र (34 टक्के), कर्नाटक आनी गुजरात (दरेकी 32 टक्के), केरळ (31 टक्के), छत्तीसगड (30 टक्के), हरियाणा आनी पश्चीम बंगाल (दरेकी 29 टक्के), तामिळनाडू, मध्य प्रदेश आनी पंजाब (दरेकी 28 टक्के), हिमाचल प्रदेश आनी ओडिशा (दरेकी 26 टक्के) ह्या राज्यांचो नंबर लागता. केंद्रशासीत प्रदेशांत चंदीगडांत 35 टक्के गुंतवणुकदार ह्यो बायलो आसात.
एएमएफआयच्या हेर एका अहवाला प्रमाण देशांतल्या हेर राज्यांचे तुळेंत गोंयची म्युच्युअल फंडांतली वट्ट गुंतवणूक उणी आसा. अशें आसलें तरीय दर व्यक्ती गुंतवणुकेंत गोंय देशांत पयले सुवातेर आसा. 31 मे 2024 चे अखेरेक गोंयांत दर व्यक्ती 2 लाख 13 हजार 480 रुपया गुंतवणूक ही म्युच्युअल फंडांत आसा. हे वळेरेंत महाराष्ट्र दुसरे सुवातेर आसा. थंय दर व्यक्ती 1 लाख 93 हजार 990 रुपया म्युच्युअल फंडांत गुंतयल्यात. केंद्रशासीत प्रदेशांत दिल्ली पयले सुवातेर आसा. दिल्लींत दर व्यक्ती 2 लाख 41 हजार गुंतवणूक आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
