भांगरभूंय | प्रतिनिधी
मंडाले, खबरां संस्था: म्यानमार हो आमचो शेजारी देश. २०२१ सावन परत लश्करशायेच्या ताब्यात गेलो. तेन्ना सावन थंय अस्थिरताय निर्माण जाल्या. लोकशायेचे समर्थक पंगड लश्करी राजवटी कडेन नेटान झगडटात. ह्या पंगडांनी जायत्या गांवांचेर नियंत्रण दवरलां. नमाराच्या लश्करी सैन्यान अशाच एका गटाच्या नियंत्रणा ला आशिल्ल्या गांवाचेर हल्लो केलो. ह्या हल्ल्यांत स भुरग्यां सयत वट्ट २७ जाणांक मरण आयलें. हो गांव मंडाले शारा पसून ६५ किलोमीटर अंतराचेर आसा.
म्यानमाराच्या लश्करी सैन्यान सशस्त्र बंडखोरांच्या (लोकशायेचे समर्थक) ताब्यांत आशिल्ल्या गांवाचेर हवाई हल्लो केला. ह्या हल्ल्यांत २७ नागरिकांक मरण आयलें आनी ३० जखमी जाले. म्यानमारांतल्या सोशय मिडियान हे विशीं खबरो उजवाडायल्यात. मंडाले शाराचे उत्तरेक ६५ किलोमीटर अंतराचेर आशिल्ल्या सिंगू शारांतल्या लेट पान या गांवाचेर हो हल्लो केलो. मंडाले हें म्यानमारचें दुसरें सगल्यांत व्हड शार.
ज्या गांवाचेर हो हल्लो जाला तो गांव जुंटा आड गट एमडीवाय-पीडीएफच्या निंयत्रणांत आसा. ह्या हल्ल्या उपरांत एमडीवाय-पीडीएफान म्हणलें, जुंटा सैन्न्यान गर्देचे सुवातेर बाजाराचेर हवाई हल्लो केलो. ह्या हल्ल्यांत स ल्हान भुरग्यां सयत २७ लोकांक मरण आयलां. एमडीवाय- पीडीएफान तांच्या टेलिग्राम चॅनेलाचेर पोस्ट करून ह्या हल्ल्याची म्हायती दिली.
चार वर्सां म्यानमार लश्करशायेच्या सत्ते खाला
कोरोना महामारींतल्यान संवसार बरो जावपाक लागलो तेन्ना १ फेब्रुवारी २०२१ दिसा म्यानमारांतल्या लश्करी सैन्यान आंग सान सून ची कीचें सरकार उडोवन देशांतली सत्ता ताब्यांत घेतली. ते उपरांत देशभर व्हड प्रमाणांत निशेध जाले. मात शांतिकायेन जाल्लीं हीं निदर्शनां थंयचे लश्करशायेन दामून उडयलीं. तेन्ना लोकांनी शस्त्रां हातांत घेतलीं. देशभर लोकशायेचे समर्थक सशस्त्र बंडखोर पंगड तयार जाल्यात आनी तांचो लश्करी सैन्याकडेन संघर्श चालू आसा. ह्या पंगडांनी देशभरांतले ल्हान ल्हान गांव आपल्या हातांत घेतल्यात आनी शेनवारा सैन्यान अशाच एका गांवाचेर हवाई हल्लो करून स्वताच्याच लोकांक मारून उडयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
