भांगरभूंय | प्रतिनिधी
प्रो. डी बी देवधर करंड वन डे क्रिकेट सर्ती खातीर दक्षीण विभागाचो पंगड जाहीर केलो. 15 वांगड्यांच्या क्रिकेट पंगडांत गोंयच्या मोहीत रेडकार आनी अर्जुन तेंडुलकर ह्या रणजी खेळगड्यांक सुवात मेळयली.
काल पर्वरीच्या गोंय क्रिकेट संघटनेचे अकादमी मुख्यालयांत दक्षीण विभागाचो पंगड वेंचपा खातीर दक्षीण विभागाचे समन्वयक रोहन गांवस देसाय हांच्या अध्यक्षपणाखाला बसका जाली. ह्या वेळार दक्षीण विभागांतले क्रिकेट संघटनेचे प्रतिनिधी उपस्थीत आशिल्ले.
निवड जाल्ल्या 15 वांगड्यांच्या क्रिकेट पंगडांत कर्नाटकाचे 5, तामिळनाडूचे 3, केरळ आनी गोंयचे दरेकी दोन जाल्यार हैदराबाद, पुडुचेरी, आंध्रप्रदेश हांचे दरेकी एकल्याचो आस्पाव आसा.
सर्त पुडुचेरींत 24 जुलय ते 3 ऑगस्ट ह्या कालावधीत जातली. राखीव खेळगड्यां मदीं तामिळनाडू आनी आंध्रप्रदेशाचे दरेकी दोन जाल्यार कर्नाटकाच्या एका खेळगड्याचो आस्पाव आसा. दक्षीण विभागाचें मुखेलपद कर्नाटकाचो मयांक अगरवाल सांबालटलो, जाल्यार उप मुखेली म्हणून केरळाचो रोहन कुन्नुमलाची निवड केली.
दक्षीण विभाग क्रिकेट पंगडः मयांक अगरवाल (मुखेली), रोहन कुन्नुमल (उप मुखेली), एन जगदीशन, रोहित रायडू, अरुण कार्तिक, देवदत्त पडिक्कल, रिकी भुई, वॉशिंग्टन सुंदर, व्ही कावेरप्पा, व्ही वैशाख, व्ही कौशिक, मोहित रेडकार, अर्जुन तेंडुलकर, सिजोमन जोसेफ आनी साई किशोर, राखीवः साई सुदर्शन, निकीन जोस, प्रदोष रंजन पॉल, नितीशकुमार रेड्डी आनी के एस भारत.
दक्षीण विभागाच्यो मॅचीः 24 जुलय-आड उत्तर विभाग, 26 जुलय-आड पश्चीम विभाग, 28 जुलय-उत्तर पुर्व विभाग, 30 जुलय-आड उत्तर विभाग, 1 ऑगस्ट-आड मध्य विभाग.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
