मोहित रेडकार भारताच्या पंगडांत

भांगरभूंय | प्रतिनिधी

आशियायी 23 वर्सां पिराये सकयली क्रिकेट सर्त

भांगरभूंय। खेळां बातमीदार

फातोड्डेंः गोंयचो रणजी खेळगडो आनी अश्टतासांचो खेळगडो मोहित रेडकार हाची 23 वर्सां पिराये सकयले आशिया करंड वन डे क्रिकेट सर्तींत खेळपी भारत अ क्रिकेट पंगडांत राखीव खेळगडो म्हणून निवड जाली.

मोहित रेडकार आनी अर्जुन तेंडुलकर हांची भारतीय 23 वर्सां पिराये सकयले क्रिकेट पंगड निवडी खातीर संभाव्य क्रिकेटरांचे वळेरेंत निवड जाल्ली.

श्रीलंकेंत जावपी सर्ती खातीर भारतीय क्रिकेट नियामक मंडळान आपलो 19 वांगड्यांचो क्रिकेट पंगड जाहीर केलो. दिल्लीच्या यश धूल हाची मुखेली म्हणून निवड केल्या. पंजाबाचो अभिषेक शर्मा उप मुखेली आसतलो.

भारतीय क्रिकेट पंगडांत निवड जाल्लो नावेली-दिकरपालीचो 22 वर्सां पिरायेचो मोहित रेडकार हो गोंयचो सवो क्रिकेटर आसा. मडगांवां जल्मल्लो दिलीप सरदेसाय हांणी मुंबयचें प्रतिनिधित्व करतना भारताच्या राष्ट्रीय पंगडांत सुवात मेळयिल्ली. ते उपरांत सौरभ बांदेकार, राहुल केणी, अविनाश दाभोळकार, स्वप्नील अस्नोडकार आनी हेरंब परब हांणी भारतीय पिराय गटांतल्या क्रिकेट पंगडांत सुवात मेळयिल्ली.
मोहितान आतां 23 वर्सां पिराये सकयल्या भारतीय क्रिकेट पंगडांत राखीव खेळगडो म्हणून सुवात मेळयली.

मोहित रेडकारान फाटल्या रणजी हंगामांत पदार्पण केल्लें. ताणें अश्टतासांचें प्रदर्शन करून सगल्यांचें लक्ष आपले वटेन ओडून घेतिल्लें. सात मॅचींतल्यान 19 विकेटी तशेंच राजस्थान आनी केरळ ह्या पंगडां आड दोन खेपे डावांनी 5 विकेटी घेतिल्ल्यो. हाचे खेरीत 238 धांवड्यो लेगीत केल्ल्यो.

आशियायी क्रिकेट कॉन्फिडरेशनाची श्रीलंकेंत जावपी वन डे क्रिकेट सर्त 13 ते 23 जुलय ह्या कालावधीत जातली. भारताचो युएई, पाकिस्तान आनी नेपाळ ह्या पंगडांच्या गटांत जाल्यार अफगाणिस्तान, बांगलादेश, ओमान आनी श्रीलंका ह्या पंगडांचो दुसऱ्या गटांत आस्पाव आसा.

13 जुलयाक भारताची पयली मॅच संयुक्त अरब अमिरात पंगडा आड, जाल्यार 15 जुलयाक पाकिस्ताना आड आनी 18 वेर नेपाळा आड जातली. सेमी फायनली 21 जुलयाक आनी फायनल 23 जुलयाक जातली.

———–

भारताचो अण्डर 23 पंगड असोः यश धूल (मुखेली), अभिषेक शर्मा (उप मुखेली), निकीन जोस, प्रदोष रंजन पॉल, रियान पराग, निशांत सिंधू, प्रभसिमरन सिंग (विकेटकीपर), ध्रुव जुरेल (विकेटकीपर), मानव सुथार, युवराज सिंग दोडिया, हर्षीत राणा, आकाश सिंग, नितीशकुमार रेड्डी, राजवर्धन हंगरगेकर, राखीव खेळगडेः हर्ष दुबे, नेहाल वढेरा, स्नेल पटेल आनी मोहित रेडकार. सितांशू कोटक (मुखेळ प्रशिक्षक), साईराज बहुतुले (बॉलींग प्रशिक्षक), मनीष बाली (फिल्डींग प्रशिक्षक).