भांगरभूंय | प्रतिनिधी
हालींच सोंपिल्ले बीसीसीआयचे 23 वर्सां पिराये सकयले आंतर राज्य वन डे क्रिकेट सर्तींत गोंयचो रणजी खेळगडो मोहित रेडकारान क्रिकेट लीगेच्या अखील भारतीय बॉलींग मानांकनांतली पयली सुवात मेळयली.
हरयाणांत 27 ऑक्टोबर ते 9 नोव्हेंबर ह्या कालावधीत जाल्ले हे सर्तींत ऑफ स्पिनर मोहित रेडकारान 6 मॅचींतल्या 5 डावांनी सगल्यांत चड 20 विकेटी घेतल्यो. वट्ट 46.4 ओव्हरी घालून मोहितान 116 धांवड्यो दिल्यो. ताणें दरेक विकेटी खातीर सरासरी 2.48 धांवड्यो मेजल्यो.
मोहितान दोन खेपे पांच विकेटी घेतल्यो.पयलीं गुजराता आड 6-11 आनी उपरांत त्रिपुरा आड 5-13 जाल्यार छत्तीसगडा आड 4-29, मुंबय आड 3-45 आनी मणिपूरा आड 2-19 अश्यो विकेटी घेतल्यो. ओडिशा आडचे अखेरचे लीग मॅचींत मोहितान बॉलींग करूंक ना. हिमाचल प्रदेशाचो रितीक कुमारान स मॅचींनी खेळटना 18 विकेटी घेवन दुसरी सुवात मेळयली. पंजाबाच्या हरजससिंग टंडन, दिल्लीच्या द्विज मेहरा आनी अनुभव त्यागी हाणें दरेकी 16 विकेटी घेवन वळेरेन तिसरी, चवथी सुवात मेळयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
