भांगरभूंय | प्रतिनिधी
गोंय क्रिकेट संघटनेचो खेळगडो मोहित रेडकार आनी अर्जुन तेंडुलकर हांची भारतीय क्रिकेट नियामक मंडळाचे इमर्जींग क्रिकेट प्लेयर्स ऑफ इंडियाच्या ‘हाय पर्फोमन्स’ क्रिकेट शिबिरा खातीर निवड जाली. भारतीय सिनीयर क्रिकेट निवड समितीन ह्या दोगांची इमर्जींग क्रिकेट प्लेयर्स 2023 खातीर निवड केल्या. हें शिबीर बंगळुरूंत राष्ट्रीय क्रिकेट अकादमींत (एनसीए) 17 ऑगस्ट ते 5 सप्टेंबर ह्या कालावधीत जातलें.
इमर्जींग क्रिकेट प्लेयर्स ऑफ इंडियाच्या सिनियर्स क्रिकेटरां खातीर आशिल्ल्या ‘हाय पर्फोमन्स’ क्रिकेट शिबिरा खातीर निवड जाल्लो रणजी खेळगडो मोहित रेडकार हो गोंयचो पयलो क्रिकेटर थारलो. गोंय क्रिकेट संघटनेक ह्या दोनूय क्रिकेटरांची निवड जाल्ल्याचो मेल आयलो.
गोंय खेळां प्राधिकरणाचे सिनीयर क्रिकेट प्रशिक्षक संदीप नायक हांच्या फातोड्ड्यां आशिल्ले आरसीसी क्रिकेट अकादमींत तयार जाल्ल्या 22 वर्सां पिरायेच्या मोहित रेडकारान 2022-23 हंगामांत राजस्थाना आड पर्वरी क्रिकेट अकादमीच्या मैदानाचेर रणजी पदार्पण केल्लें. ऑफ स्पिन बॉलींग घालपी आनी गरजे वेळार उपेगी बॅटींग करपी मोहितान पदार्पणाचे मॅचींत डावांत 5 विकेटी घेतिल्ल्यो.
केरळा आड लेगीत डावांत पांच विकेटी घेवपी मोहितान फाटल्या हंगामांत 238 धांवड्यो आनी 19 विकेटी घेतिल्ल्यो. कर्नल सी के नायडू क्रिकेट सर्तींत 3 मॅचींनी खेळटना 145 धांवड्यो केल्ल्यो आनी 6 विकेटी लेगीत घेतिल्ल्यो. अंदूंचे जीपीएलाचे पावणेंत दुसरो म्हारगो क्रिकेटर थारिल्ल्या मोहितान दोन मॅचींतल्यान 16 विकेटी घेतिल्ल्यो. सध्या मोहित लोणावळ्यांत साळगांवकार क्रिकेट क्लबाचें प्रतिनिधित्व करता.
गोंया खातीर अंदूं प्रोफेशनल क्रिकेट खेळगडो म्हणून खेळिल्ल्या अर्जुन तेंडुलकराची लेगीत इमर्जींग क्रिकेट प्लेयर्स ऑफ इंडियाच्या ‘हाय पर्फोमन्स’ क्रिकेट शिबिरा खातीर निवड जाली. आयपीएलांत मुंबय इंडियन्सा वतीन खेळिल्ल्या अर्जुनान अंदूंच्या रणजी हंगामांत सात मॅचींतल्यान 12 विकेटी आनी राजस्थाना आड एक शेंकडो मारून 223 धांवड्यो केल्ल्यो.
मोहित रेडकार आनी अर्जुन तेंडुलकर हांची निवड जाल्ले खातीर गोंय क्रिकेट संघटनेचे अध्यक्ष विपुल फडके तशेंच मानद सचीव रोहन गांवस देसाय हांणी परबीं भेटयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
