भांगरभूंय | प्रतिनिधी
फास्ट बॉलर मोहम्मद शमी इंग्लंडा आड जावपी पांच टी-20 मॅचीचे माळे खातीर भारताच्या पंगडाचो वांगडी आसतलो. ही माळ 22 जानेवारी सावन कोलकातांत सुरू जातली. शमीन 2023चे संवसारीक वन डे क्रिकेट सर्तींत आपली निमाणी आंतरराष्ट्रीय मॅच खेळिल्ली. ते उपरांत खोटेक दुखापत जाल्ल्यान ताणें ऑपरेशन करून घेतलें आनी ते उपरांत धोंपराची समस्या लेगीत जाली.
इंग्लंडा आडचे माळे खातीर मुखेली सूर्यकुमार यादव सयत पुराय भारताच्या पंगडाची काल घोशणा केली. हे माळे उपरांत जावपी वन डे माळ जातली. ताचे खातीर पंगडाची घोशणा करूंक ना. तशेंच चॅम्पियन्स ट्रॉफी खातीर पंगडाची घोशणा जावपाची आसा. पंगडाची घोशणा करपाची निमाणी 12 जानेवारी मेरेन आसा.
इंग्लंडा आडचे माळे खातीर वेंचिल्ल्या 15 वांगड्यांच्या पंगडांत फास्ट बॉलर जसप्रीत बुमराची निवड करूंक ना. ऑस्ट्रेलिये आडचे बॉर्डर-गावस्कर ट्रॉफीचे पांचवे टॅस्टी वेळार ताका दुखापत जाल्ली. पूण, ताचे दुखापती विशीं पुराय म्हायती मुखार येवंक ना.
बॅटींग अश्टतासांचो खेळगडो रियान परागाची लेगीत निवड करूंक ना. भुजाचे दुखापतींतल्यान पुर्ण बरो जावपाचो ताचो यत्न चालू आसा. विकेटकीपर बॅट्समन ऋषभ पंताची लेगीत निवड करूंक ना. 15 वांगड्यांच्या पंगडांत संजू सॅमसन आनी ध्रूव जुरेल ह्या दोन विकेटकीपर बॅट्समनांचो आस्पाव केला.
दक्षीण आफ्रिके आडची टी-20 माळ भारतान जिखिल्ली. त्या पंगडांत रमणदीप सिंग, जितेश शर्मा, अभिषेक शर्मा, आवेश खान, यश दयाल आनी विजय कुमार हांचो आस्पाव आशिल्लो. पूण, तांची इंग्लंडा आडचे माळे खातीर निवड करूंक ना. तांचे सुवातेर यशस्वी जयस्वाल, नितीश कुमार रेड्डी, हर्षित राणा, ध्रूव जुरेल, मोहम्मद शमी आनी वॉशिंग्टन सुंदर हांची निवड केल्या.
पोरूं नोव्हेंबरांत देशांतर्गत क्रिकेटींत शमीन पुनरागमन केल्लें. सैयद मुश्तक अली ट्रॉफींत बांगला वतीन णव टी-20 मॅची खेळिल्ल्यो. ताणें 7.85चे इकॉनमी रेटीन 11 विकेटी घेतिल्ल्यो. ते उपरांत विजय हजारे ट्रॉफींत सातांतल्यो फकत तीन 50 ओव्हरींच्यो मॅची खेळ्ळो. तातूंत ताणें 25.80चे सरासरीन 5 विकेटी घेतल्यो. ऑस्ट्रेलियेचे भोंवडे खातीर ताची निवड जावपाची शक्यताय कांय तज्ञांनी उक्तायिल्ली. पूण, तो पुर्णपणान बरो जावंक नाशिल्ल्यान ताच्या नांवाचो विचार जावंक नाशिल्लो.
22 जानेवारी ते 2 फेब्रुवारी मेरेन कोलकाता, चेन्नय, राजकोट, पुणें आनी मुंबय ह्या शारांनी मॅची खेळटलो. ते उपरांत तीन वन डे मॅची जातल्यो. पयली मॅच 6 फेब्रुवारीक नागपूरांत, 9 फेब्रुवारीक कटकांत आनी 12 फेब्रुवारीक अहमदाबादांत जातली.
पंगडः सूर्यकुमार यादव (मुखेली), संजू सॅमसन (विकेटकीपर) , यशस्वी जयस्वाल, तिलक वर्मा, नितीश कुमार रेड्डी, मोहम्मद शमी, अर्शदीप सिंग, हर्षित राणा, ध्रुव जुरेल, रिंकू सिंग, हार्दिक पांड्या, अक्षर पटेल, रवि बिश्नोई, वरुण चक्रवर्ती आनी वॉशिंगटन सुंदर.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
