भांगरभूंय | प्रतिनिधी
एकलो जखमी; पळून गेल्ल्या मोटार चालकाक अटक
भांगरभूंय । प्रतिनिधी
फोंडें: सुकतळी मोल्यां सोमारा सकाळीं 10 वरांच्या सुमाराक इनोव्हा मोटारीचो दुचाकीक धपको बसून जाल्ल्या अपघातांत कादर महमद गौस वंटी (19, कुळे) ह्या दुचाकी चालकाक मरण आयलें. ह्या अपघातांत दुचाकी फाटल्यान बशिल्लो अण्णा दुराई हो किरकोळ जखमी जाला.
अपघाता उपरांत गाडी घेवन पळून गेल्ल्या काबील नागार्जून के. पी. (29, तामीळनाडू) हाका कुळें पुलिसांनी कोलव्यां ताब्यांत घेतलो. सांजे उसरां ताका अटक केली.
मेळिल्ले म्हायती प्रमाण कादर महमद गौस वंटी हो दुचाकी वयल्यान (जीए 12 बी 2447) धारबांडोड्यां वतालो. सुकतळी वाठारांत ताच्या फाटल्यान येवपी इनोव्हा मोटारीचो धपको ताका बसलो. ह्या धपक्याक लागून कादर रस्त्याचेर गंभीर जखमी जावन पडलो. अपघाता उपरांत दुबावीत मोटार चालक फोंडेंचे दिशेन पळून गेलो.
अपघातांत गंभीर जखमी जाल्ल्या कादर हाका 108 अॅम्ब्युलन्सींतल्यान पिळये मुळाव्या भलायकी केंद्रांत उपचारा खातीर दाखल केलो. पूण थंय दाखल करचे आदींच ताका मरण आयलें.
अपघाताची म्हायती मेळटाच कुळें पुलीस स्टेशनाचे निरिक्षक संजीव दळवी आनी उपनिरिक्षक अजय धुरी हांणी घडणुकेचे सुवातेचेर वचून अपघाताचो पंचनामो केलो. पघाता उपरांत पळून गेल्ल्या मोटर चालकाक मोटारी सयत कोलवें पुलिसांनी ताब्यांत घेतलो. कुळें पुलिशेन ताका ताब्यांत घेवन रितलर अटक केली. सोमारा दनपारां कादराचे कुडीचो पोस्टमार्टम केलो. ते उपरांत ती कूड ताच्या घरच्यांचे सुवादीन दिली. निरिक्षक संजीव दळवी हांच्या मार्गदर्शना खाला उपनिरिक्षक अजय धुरी ह्या अपघात प्रकरणाचो फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
