भांगरभूंय | प्रतिनिधी
फोंडें: फोंडें-रामनगर म्हामार्गार मोलें-नद्रण हांगा रस्त्याचे कुशीक पार्क केल्ल्या ट्रकाक दुचाकीचो नेटाचो धपको बसून काल (आयतारा) सकाळीं 6.30 वरांच्या सुमाराक कर्नाटकांतल्या दोगां तरणाट्याक मरण आयिल्ल्याची धक्को दिवपी घडणूक घडली.
जोयडा तालुक्यांतल्या आखेती पंचायत वाठारांतल्या मेढा हांगाचो राजेश देसाय (25) हाका जाग्यारूच मरण आयलें. जाल्यार हळीयाळ हांगाचो निखील मडीवाळ (24) हाका जखमी अवस्थेंत धारबांदोडेंच्या भलायकी केंद्रांत उपचारा खातीर व्हलो तेन्ना ताका मरण अयिल्ल्याचें दोतोरांनी जाहीर केलें.
हे दोगूय तरणाटे गोंयांत युनिकॉम कंपनींत कामाक आशिल्ले. काल फांतोडेर ते आधार कार्डा कडेन संबंदीत कामा खातीर आपल्या गांवघरा वताले. त्या वेळार तांचेर काळान घालो घालो.
ह्या अपघाताची कुळें पुलीस स्टेशनार नोंद जाल्या. दोगांचीय कूड मरणा उपरांतची तपासणी करून सोर्ययांचे सुवादीन केल्या. ह्या प्रकरणाचो फुडलो तपास पुलीस करतात.
मजगतीं, म्हामार्गार पार्क केल्ल्या ट्रका कडेन संबंदीत जिवघेणे अपघात सुरूच आसात. एका वर्सांत पार्क केल्ल्या ट्रकाक फाटल्यान धपको दिल्ल्यान आतां मेरेन चार जाणांक मरण आयलां. हे खातीर थळाव्या लोकांनी हुस्को उक्तायला. अशे अपघात आडावपा खातीर संबंदीत अधिकाऱ्यांनी उपाय येवजण करची अशी थळाव्यांनी विनंती केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
