भांगरभूंय | प्रतिनिधी
फोंडें: मोलेंच्या राष्ट्रीय म्हामार्गा कुशीक रान खात्या वतीन बांदिल्ली जैव विविधता बाग विद्यार्थ्यां खातीर पिकनिकेची सुवात म्हूण फामाद जायत आसा.
पोरूं साबार पर्यटकांनी आनी विद्यार्थ्यांनी हे बागेक भेट दिवन सैमाचो अणभव घेतला. फुडल्या कांय दिसांनी गोंयांतल्या विवीध हायस्कुलांतले विद्यार्थी व्हड संख्येन हे बागेंत पिकनिके खातीर येवपाची शक्यताय आसा. दर वर्सा गोंयांतल्या विद्यार्थ्यांक धारबांदोडें म्हालांतल्या तांबडीसुर्ल वाठारांतलें नामनेचें महादेव मंदीर आनी संजीवनी साखर कारखानो पळोवपा खातीर पिकनिकेक व्हरताले. पूण संजीवनी साखर कारखानो फाटल्या कांय वर्सां सावन बंद जाल्ल्यान सध्या मोलेंच्या जैव विविधता बाग विद्यार्थ्यां खातीर चड फायद्याची थारता. बागेंत आशिल्ली विवीध तरांची वनस्पत, वखदी वनस्पत, विवीध जनावरांच्यो आकृत्यो आनी हेर सैमाचो आस्वाद घेवपाची संद विद्यार्थ्यांक मेळ्ळ्या. बागेंत येवपी पर्यटकांक तशेंच विद्यार्थ्यांक फुकट प्रवेश दितात. ताका लागून फुडल्या कांय दिसांनी विद्यार्थ्यांची संख्या वाडपाची शक्यताय आसा.
बाग विद्यार्थ्यांक फायद्याचीः जयेश भोसले
मोलेंचे बागेंत विवीध तरांची वनस्पत पळोवपाची संद विद्यार्थ्यांक मेळटा. वखदी वनस्पत तशेंच हेर म्हायती बागेंत मेळटाच मेळटा. ताका लागून गोंयांतल्या शालेय विद्यार्थ्यांनी बागेक भेट दिवन म्हायती एकठांय केली जाल्यार तांकां ती शिक्षणा खातीर फायद्याची थारतली, अशें शिक्षक जयेश भोसले हांणी सांगलें. बुधवारा सकाळीं पोरणें गोंयच्या एका हायस्कुलांतल्या तांचे सयत सुमार 100 विद्यार्थ्यांनी हे बागेक भेट दिली. ह्या वेळार भोसले प्रतिनिधी कडेन उलयताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
