भांगरभूंय | प्रतिनिधी
नितळसाण मोहिमेंत एकठांय केलो 30 पोतयो कोयर
भांगरभूंय । प्रतिनिधी
केरी- सत्तरीः मोर्लें सत्तरीचे जैवविविधता वेवस्थापन समिती आनी मोर्ले पंचायत हांच्या जोडपालवान व्हाळवाट न्हंयेची नितळसाण मोहीम हातांत घेतिल्ली. मोर्लेच्यान व्हांवपी व्हाळवाट न्हंयेदेगे वयल्या गिमईवाडो बांद आनी खरब्रा ह्या वाठारांत नितळसाण मोहीम हातांत घेवन सुमार 30 पोतयो प्लास्टीक, सोऱ्याच्यो बाटल्यो आनी हेर कोयर एकठांय केलो.
व्हाळवाट न्हंय ह्या वाठारांतली जैवविविधतेचें संवर्धन करपाची म्हत्वाची भुमिका करता. हे न्हंयेचें उदक पियेवपाच्या उदकाचो मुखेल स्त्रोत. ताची नितळण दवरली जाल्यार न्हंयेचें बरें उदक मेळटलें आनी आमची भलायकी निरोगी उरतली. ताका लागून हे न्हंयेचें संवर्धन करप गरजेचें आशिल्ल्यान नितळसाण मोहीम हातांत घेतिल्ली, अशें मोर्ले जैवविविधता समितीचे अध्यक्ष कृष्णा गांवस हांणी सांगलें. संवसारीक पर्यावरण दिसा निमतान ही मोहीम हातांत घेतिल्ली. हे मोहिमे वेळार मोर्लेची पंचायत सचीव मोनाली बेतकीकार, उपसरपंच रुचिता माईणकार, पंच रुपेश मळीक, भाग्यश्री गांवकार, मसो तानोडी, आदली सरपंच शुभदा गांवस, पंचायत कर्मचार संजीत गांवकार, दिनेश माईणकार, पंचायत नितळसाण कर्मचारी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
