भांगरभूंय | प्रतिनिधी
आंदोलन करिनासतना चर्चेक येयात: मुख्यमंत्री
पणजी : युनिटी मॉल रद्द करपा विशीं सरकारा वतीन सभाघरांत निवेदन वा खंयचेंच आस्वासन दिवंक नाशिल्ल्यान चिंबल ग्रामस्थांनी आंदोलन चालूच दवरलां. विधानभवनाचेर काडिल्लो मोर्चा पुलिसांनी पणजेच आडायिल्ल्यान चिंबलचे ग्रामस्थ आतां मेरशे जंक्शनार बसून रावल्यात. विरोधी पक्ष फुडारी युरी आलेमांव, कॉंग्रेस आमदार एल्टन डिकॉस्टा, आप आमदार वेंजी व्हिएगस, आरजीचे आमदार विरेश बोरकार हांणी आंदोलकांची भेट घेवन तांकां फाटबळ दिलें.
चिंबलच्या लोकांनी आंदोलन करून जनतेची गैरसोय करिनासतना चर्चे खातीर येवचें. तोडगो काडपा खातीर चार जाणांच्या शिश्टमंडळा वांगडा चर्चा करपाची सरकारची तयारी आसा, अशें मुख्यमंत्री डॉ. प्रमोद सावंत हांणी सभाघरांत स्पश्ट केलें.
युनिटी मॉलाचे परवाने रद्द करपाचे जे आदेश न्यायालयान दिल्यात, ते विशीं सरकार कायदेशीर सल्लो घेतलें, अशेंय मुख्यमंत्र्यांनी स्पश्ट केलें.
आयज सकाळीं शेकड्यांनी चिंबलीचे लोक मोर्चा खातीर पणजे जमा जाले. मोर्चाची पयलींच कल्पना आशिल्ल्यान पयलींच ह्या वाठारांत पुलीस फौज फांटो दवरिल्लो. युनिटी मॉल रद्द कपा विशीं सभाघरांत सरकारा वतीन निवेदन करचें, अशी आंदोलकांची मागणी आशिल्ली. अशे तरेचें कसलेंच निवेदन करूंक नाशिल्ल्यान ग्रामस्थ रस्त्यारूच बसून रावले.
ह्या प्रस्नाचेर आमचें ग्रामस्थांक पुराय फाटबळ आशिल्ल्याचें कॉंग्रेस विधिमंडळ फुडारी युरी आलेमांव हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
