मोरॉक्को-क्रोएशिया मॅच गोलाविणें बादाबाद

भांगरभूंय | प्रतिनिधी

2018त रशियेंत जाल्ले संवसारीक फुटबॉल सर्तींत क्रोएशिया पंगडान फायनलींत सुवात मेळोवन इतिहास घडयिल्लो. पूण, सध्याचो उपवस्ताद पंगडाक अंदूंचे संवसारीक सर्तींत मोरॉक्को आडचे आपले पयले मॅचींत एकूय गोल करपाक जमलो ना.

ताचो मुखेली ल्युका मॉड्रिचचो जादू कालचे मॅचींत दिसूंक ना. एफ गटांतली क्रोएशिया आनी मोरॉक्को पंगडां मदली मॅच गोलाविणें बादाबाद उरली. दोनूय पंगड संवसारीक सर्तींत पयले खेपे एकामेका आड खेळ्ळे. पयल्या अर्दांत दोनूय पंगडांनी शांत सुरवात करून एकामेकांचो खेळ समजून घेवपाचो यत्न केलो. मजगतीं, मोरॉक्कान आपल्या आक्रमणाची धार वाडयली. ताका उपरांत क्रोएशियान लेगीत प्रतीआक्रमण करीत बरे तरेन प्रत्त्युत्तर दिवपाचो यत्न केलो. मोरॉक्कोन पयल्या अर्दांत क्रोएशियाच्या गोलपोस्टा वटेन पांच शॉर्ट्स मारले. पूण, तातूंतलो एकूय ऑन टार्गेट नाशिल्लो.

क्रोएशियान लेगीत मोरॉक्कोचे गोलपोस्टाचेर चार खेपे हल्लो केलो. तातूंतलो एक अचूक आशिल्लो. पूण, मोरॉक्कोचो गोलकीपर बोनो हाणें हो यत्न फुकट घालयलो.

क्रोएशियाचो स्टार खेळगडो ल्युका मॉड्रिचान पयलें अर्द सोंपत येत आसतना एक नेटाचो फटको मारलो. पूण, हो फटको मोरॉक्कोच्या गोलपोस्टा वयल्यान भायर गेलो. पासींग आनी बॉल ताब्यांत दवरपांत दोनूय पंगडांनी बराबरीचो खेळ केलो.

दुसऱ्या अर्दांत सध्याचो उपवस्ताद क्रोएशियान दुबळ्या मोरॉक्को आड बरो खेळ करीत गोलशुन्याची कोंयडी फोडटलो अशें दिसतालें. पूण, मोरॉक्कोच्या आक्रमणाचेर प्रतीआक्रमण करपाक क्रोएशिया उणो पडलो. दुसऱ्या अर्दांत मोरॉक्कोन आठ खेपे क्रोएशियाच्या गोलपोस्टाचेर आक्रमण केलें. तातूंतलो फक्त तोन शॉर्ट्स ऑन टार्गेट आशिल्ले. दुसरे वटेन मोरॉक्कोन क्रोएशियाक फक्त पांच खेपे स्वताच्या गोलपोस्टाचेर चाल करून येवपाची संद दिली. विशेश म्हणल्यार क्रोएशियान बॉल आपल्या नियंत्रणांत दवरपांत आनी पासिंगेंत पुर्ण मॅचींत शेक दवरलो. तरी आसतना ताका फक्त दोन शॉट्स ऑन टार्गेट मारपाक जमले.