मोरजे 23 फेब्रुवारीक ‘जायो जुयो’ कार्यावळ

भांगरभूंय | प्रतिनिधी

पणजी ः मोरजे, 23 फेब्रुवारीक लोककवी मनोहरराय सरदेसाय आनी विचारवंत रवींद्र केळेकार हांच्या जल्म शताब्दीच्या निमतान ‘शब्दुलीं प्रतिश्ठान’ एक खाशेली कार्यावळ घडोवन हाडटा. राजभाशा संचालनालय आनी गोवा कोंकणी अकादेमीच्या पालवान 23 फेब्रुवारीक मोरजे, पेडणेंच्या कळस मांगर सभाघरांत ‘जायो जुयो’ ही खाशेलीं कार्यावळ जातली.

सकाळीं 9:30 वरांचेर उक्तावण सुवाळो जातलो. कार्यावळीचे मुखेल सोयरे गिरीश रवींद्र केळेकार म्हणून आनी चेतन आचार्य (आदले अध्यक्ष, कोंकणी भाशा मंडळ) मानाचे सोयरे म्हूण हाजीर आसतले.
10 ते 10:30 मेरेनच्या सत्रांत मनोहरराय सरदेसाय आनी रवीद्र केळेकार हांच्या साहित्याचेर आनी जिणेचेर भर दिवपी उलोवप अपर्णा गारुडी करतली. 10.30 वरांचेर कवींचो मेळावो जातलो, उपरांत 11 ते 11.45 मेरेन आमंत्रीत कवीं कविता सादर करतले. 11:45 वरांचेर दामोदर के. का. घाणेकार हांचे लेखन मार्गदर्शन सत्र आसतलें.
‘जायो जुयो’ कार्यावळींत मनोहरराय सरदेसाय हांची गितां दनपरां 12:45 वरांचेर सादर जातलीं. 1:15 वरांचेर समारोप जातलो. हे कार्यावळीक गोंयकारांनी हाजीर रावून कोंकणी साहित्य आनी संस्कृतायेच्या ह्या उत्सवाचो आस्वाद घेवचो असो आयोजकांनी उलो मारला.