भांगरभूंय | प्रतिनिधी
हजारांनी रुपयांचें लुकसाण; लुकसाण भरपायेची मागणी
भांगरभूंय । प्रतिनिधी
पेडणें: बागवाडो मोरजे मिलाग्रीस चर्च वाठारांत शेतकारांनी पोरसांत मिरसांगो लायिल्ल्यो. त्या वाठारांत 16 फेब्रुवारीक सुकिल्ल्या तणाक कोणे तरी अज्ञात मनशान उजो लायलो. तो उजो मिरसांगेंच्या पोरसा मेरेन पावलो. पोरसाक बडयांची वंय केल्ली. ह्या उज्यान वंयेन पेट घेतलो आनी ताच्या धगान रोपे करपले जाल्यार कांय रोपे लासले.
हें दृश्य पळोवन शेतकार रडटाले. तांणी पयसुल्ल्यान उदक हाडून पोरसूं शिंपिल्लें. ह्या उज्यांत फक्त रोपेच लासले नात जाल्यार शेतकारांचे कश्टूय हुलपले. पार्वती महादेव नारोजी, गुणवंती हरमलकार आनी संजीवनी मांद्रेंकार ह्या शेतकारांचे मिरसांगेंचे रोपे लासल्यात. कृशी विभागान हे घडणुकेची दखल घेवन शेतकारांक लुकसाण भरपाय दिवची अशी पिडेस्त शेतकारांनी मागणी केल्या. उजो कोणे लायिल्लो तो कळूंक ना, अशें शेतकारांनी म्हणलां. हो उजो पालोवपाक लेगीत तांकां पयसुल्ल्यान उदक हाडचें पडिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
