भांगरभूंय | प्रतिनिधी
पर्यटन मोसमाचे सुरवेकूच पर्यटन खात्याची कारवाय
भांगरभूंय । प्रतिनिधी
पेडणें: गोंयांत आदीं ऑक्टोबर ते मे ह्या काळांत पर्यटन मोसम चलतालो. पूण हालीं 365 दीस पर्यटक दर्यादेग वाठारांत येतात. तांची वेवस्था करचे खातीर थळावे आनी बिगर गोंयकार वेवसायीक पर्यटन मोसमांत दर्यादेगांचेर व्हड प्रमाणांत लांकडी खाटी, कुटीर, रॅस्टोरंण्ट उबारतात. पर्यटन खात्यान शुक्रारा दर्यादेगेर घातिल्या शेंकड्यांनी खाटींचेर कारवाय केली.
पर्यटन खात्याचे उपसंचालक गजानन महाले हांच्या फुडारपणा खाला विठ्ठलदास वाडो वाठारांतल्या दर्यादेगेर तीन कुटीर वेवसायिकांनी शेंकड्यांनी लांकडी खाटी घातिल्ल्यो. तांचेर कारवाय करतना त्यो खाटी जप्त केल्यो. अचकीत जाल्ले कारवायेन पर्यटक लेगीत भियेले. कांय पर्यटक सांजेच्या 7 वरां मेरेन खाटींचेर सुसेग घेताले जाल्यार कांय जाण खाम खाताले. ताका लागून कारवायेक कळाव जातालो. ही कारवाय चालू आसतना कसलीच वायट घडणूक घडची न्हय हे खातीर व्हड प्रमाणांत पुलीस बंदोबस्त दवरिल्लो.
मोरजी दर्यादेगेर व्हड प्रमाणांत लांकडी खाटी घातिल्ल्याची कागाळ थळाव्या लोकांनी केल्ली. ते प्रमाण शुक्राराच पर्यटन खात्याच्या अधिकाऱ्यांनी ह्या पुराय दर्यादेग वाठाराची पळोवणी केली आनी त्यो खाटी काडच्यो ना जाल्यार जप्त करतले, अशी शिटकावणी दिल्ली. तरी लेगीत वेवसायिकांनी ते कडेन आडनदर केल्ली. महाले हांच्या फुडारपणा खाला केल्ले कारवायेंत खाटी सयत मेजां, कदेलां आनी व्हड प्रमाणांत सत्र्योय जप्त केल्यो. दर्यादेग वाठारांत व्हड प्रमाणांत कारवाय चालू आशिल्ली तेन्ना व्हड संख्येन पुलीस हाजीर आशिल्ले. त्या वेळार दोन- तीन रॅस्टोरंण्टांत व्हड आवाजांत संगीत चलतालें. मात तांचेर कसलीच कारवाय करूंक ना.
कारवाय चालूच उरतलीः गजानन महाले
हे फुडेंय ही कारवाय अशीच चालू उरतली. जांणी कोणें लांकडी खाटी घालपाक अजून मेरेन परवानगी घेवंक ना तांणी ते घेवची आनी कायदेशीर वेवसाय करचो. बेकायदो वेवसाय करप्यांचेर हे फुडें लेगीत खर कारवाय करतले, अशी शिटकावणी पर्यटन खात्याचे उपसंचालक गजानन महाले हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
