भांगरभूंय | प्रतिनिधी
पेडणें: मोरजी पंचायत वाठारांतलो न्यू वाडो ह्या मुखेल रस्त्या कुशीक उत्तर गोंय जिल्लोधिकार्यान नो पार्किंग झोन जाहीर केलो. ते प्रमाण मोरजी पंचायत मंडळान फुडाकार घेवन ते सुवातेर नो पार्कींग तक्टो लायलो. मात रस्त्या कुशीक जीं हॉटेलां, दुकानां, रिसॉर्टां आसात तांणी गिरायकांची पार्कींग वेवस्था करूंक ना. हाका लागून वाहन चालक आपापलीं वाहनां वा भाड्याचीं वाहनां रस्त्याचे दोनूय वटेन नो पार्कींग तक्टो आसून लेगीत आडखळ निर्माण करता. हाचेर येरादारी खात्यान आनी ट्राफिक पुलिसांनी कारवाय करपाची मागणी नागरीक करतात.
न्यू वाडो मोरजे वाठारांतल्या मुखेल रस्त्या कुशीक थळावे आनी बिगर गोंयकार वेवसायिकांनी विवीध वेवसाय सुरू केल्यात. हातूंत हॉटेलां, सुपर मार्केट आनी हेर वेवसायांचो आसपाव आसा. हे वेवसाय उबारतना वा एकादें बांदकाम करतना कोणाचोच विरोध ना. मात वेवसायिकांनी आपल्या दुकानांचेर जीं गिरायकां वाहनां घेवन येतात तांची वेवस्था करची. सध्या गिरायकां आपलीं वाहना रस्त्याचेर दवरून येरादारीक आडखळ निर्माण करता. ट्राफीक पुलिसांनी जे कोण नो पार्किंग झोन हो तक्टो पळोवन लेगीत आपलें वाहन पार्क करतात तांकां पयलीं समजावन, दुसरे खेपो अशेंच केल्यार तांचेर कारवाय करपाची मागणी थळावे करतात.
तशेंच ह्या विशयाचेर आतां मोरजी पंचायत मंडळांनी फुडाकार घेवन फुडली कारवाय करपा खातीर पावलां उबारचीं, अशी मागणी जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
