भांगरभूंय | प्रतिनिधी
सुरेखा शेटगांवकाराच्या समर्थकांनी लायलो फोग
पेडणें: पंचायत वेंचणुके खातीर काल (बुधवारा) मतदान जालें. शुक्रारा मतमेजणी जावपाची आसा. पूण मतमेजणेची वाट पळयनासतनाच मोरजी पंचायतींतल्या प्रभाग दोनचे उमेदवार सुरेखा अमीत शेटगांवकार हांच्या समर्थकांनी मात मतदान जाले उपरांत आपलेंच जैत जाल्ल्याची खोस मनयली. श्री देव दाडोबा देवस्थान वाठारांत व्हड प्रमाणांत फोग लावन समर्थकांनी जैत मनयलें.
मोरजी पंचायत वाठारांतल्या प्रभाग दोनांतल्यान वट्ट 690 परस चड मतदारांनी मतदान केल्ल्यान तातूंतलें 90 टक्के मतदान हें आपल्याकूच मेळ्ळें हे खातीर आपल्या समर्थकांनी निकालाची वाट पळयनासतना जैताची खोस मनयली अशी प्रतिक्रिया उमेदवार सुरेखा अमीत शेटगांवकार हांणी दिली.
भाजपा महिला उपध्यक्ष नयनी शेटगांवकार हांणी ह्या वेळार प्रतिक्रिया दितना सांगलें की, जे पद्दतीन प्रभाग दोनांत मतदान जालें ते प्रमाण सुरेखा शेटगांवकार हांकां सुमार 600 मतां मेळटलीं आनी त्यो जैतिवंत जातल्यो हें पलयींच निश्चीत जालां. ताका लागून आमी हांगा जैत मनयले अशें तांणी सांगलें.
आदले उपसरपंच अमीत शेटगांवकार हांणी आपली प्रतिक्रिया दितना निकालाचो दीस शुक्रार जरी आसलो तरी कार्यकर्त्यांची उमेद पळयतकूच जैताचो उत्सव आयजूच मनयलो. जो ह्या प्रभागांत आपणे विकास केला ताका लागून म्हजे घरकान्नीचें जैत निश्चीत आसून एकतर्फी जैत जातलें असो दावो तांणी केलो.
सुरेखा शेटगांवकार हांणी ह्या वेळार सगल्या मतदारांचे उपकार मानून जैता खातीर आनी आपल्याक चडांत चड मतदान करपा खातीर जांणी फुडाकार घेतला त्या सगल्यांचे हांव उपकार मानतां, आनी मतदारांनी जो आपल्याचेर विस्वास दाखयला ताका आपूण पात्र थारतली अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
