भांगरभूंय | प्रतिनिधी
पणजीः आश्वे आनी मोरजे दर्यादेगांचेर घाणयारे उदक उक्त्या मळार सोडटात. ह्या घाणयाऱ्या उदकाक लागून दर्याचें उदक प्रदुशीत जाता आनी ताचो थेट परिणाम दर्याच्या जैवविविधतेचेर जावपाक लागला. प्रदुशीत घाणयारे उदक, आवाज प्रदुशण, वीज लायटीक लागून कांसव दर्यादेगेर तांतयां घालपाक येवप टाळटात. पर्यावरणाच्या समतोला खातीर हें हुस्क्याचें आशिल्ल्याचे मत पर्यावरण मोगींनी उक्तायलें.
घाणयारे उदक उक्त्या सुवातेर सोडपाच्या वाठारांत पर्यावरण मोगींनी एकठांय येवन हुस्को उक्तायलो. पर्यावरण सांबाळपाखातीर उपाय करप, घाणयाऱ्या उदकाचें वेवस्थापन सुदारप आनी ह्या दर्यादेगांचेर आवाज आनी मनशाच्या हस्तक्षेपाचेर नियंत्रण दवरपा खातीर बेगोबेग पावलां उबारप गरजेचें आसा. नाजाल्यार ह्या दर्यादेगांचें सैमीक दायज आनी फुडाराक जैवविविधताय व्हड धोक्यांत पडूं येता अशी शिटकावणी तांणी दिल्या.
मोरजे आनी आश्वेच्या दर्यादेगेर हॉटेलां, रिसॉर्ट्स आनी वेवसायीक घाणयारे उदक उक्त्या सुवातेर सोडटात असो दावो पर्यावरण मोगींनी केला. वाठाराची पळोवणी केले उपरांत तांणी वयली म्हायती दिली. हातूंत आलेक्स नोरोन्हा, अॅनिका प्रोएक्निका, अल्बर्ट फर्नांडीस, डेन्झील सिक्वेरा, आरोन फर्नांडीस, मारियान बोर्गो (फ्रेंच नागरीक) आदी हांचो आस्पाव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
