भांगरभूंय | प्रतिनिधी
पणजी : गोंय पुलिसांच्या घुंवळे वखदां विरोधी पंगडान (एएनसी) मोरजी- पेडण्यां छापो घालून एकल्याक अटक केली. त्या दुबाविताचें नांव जवाहर सिंह जिबू (रा. कुल्लू- हिमाचल प्रदेश) अशें आसा. पुलिसांनी ताचे कडल्यान ४.५ लाख रुपयांचो ४५० ग्राम चरस जप्त केलो.
चड म्हायती प्रमाण, मोरजे हिमाचल प्रदेशांतलो एक मनीस चरस घेवन येवपाचो आशिल्ल्याची म्हायती गोंय पुलिसांच्या घुंवळे वखदां विरोधी पंगडाक मेळिल्ली. ते प्रमाण पुलिसांनी ते सुवातेर लक्ष दवरलें. उपरांत शेनवारा रातचो सांपळो रचून दुबाविताक ताब्यांत घेतलो. ताची तपासणी केली तेन्ना ताचे कडल्यान वट्ट साडेचार लाख रुपयांचो ४५० ग्राम चरस सांपडलो.
मुळावे चवकशे मजगतीं तांणी दिल्ले म्हायती प्रमाण, तांणी स्वता ह्या चरसाचें उत्पादन केल्लें आनी तो विकपा खातीर तो गोंयांत आयिल्लो. उपरांत ताचेर घुंवळे वखदां विरोधी कायद्याच्या विवीध कलमां खाला गुन्यांव नोंद करून अटक केली.
हे मोहिमेंत एएनसीचे पुलीस अधीक्षक टिकम सिंह वर्मा तशेंच एएनसी अधीक्षक नेल्सन अलबुकर्क हांच्या मार्गदर्शना खाला आनी पुलीस निरीक्षक सजिथ पिल्लई हांच्या नेतृत्वा खाला पंगडान वाटो घेतलो. हो छापो पुलीस निरीक्षक मंजुनाथ नायक हांणी घालो. ह्या वेळार तांचे वांगडा हेड कॉन्स्टेबल सेड्रीक फर्नांडीस, कॉन्स्टेबल अमित साळुंखे, राहुल गांवस, अक्षय नायक, महिला कॉन्स्टेबल ज्योती नायक आनी पोलीस ड्रायवर कुंदन पाटेकार हजर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
