भांगरभूंय | प्रतिनिधी
पेडणें: मोरजे पंचायतीची ग्रामसभा सरपंच विलास मोरजे हांचे अध्यक्षते खाला जाली. ह्या वेळार विवीध विशयांचेर चर्चा जाली. हातूंत रस्त्याचेर अतिक्रमण, नो पार्कींग झोन, गटार वेवस्था, गार्बेज, वेवसायिकांचो कर, रस्तो रुंदीकरण, स्पिडब्रेकरण अश्या विशयांचेर चर्चा जाली.
ह्या वेळार उपसरपंच सुप्रिया पोके , पंच मंदार पोके, पंच मुकेश गडेकार, पंच स्वप्निल शेटगांवकार, पंच वांगडी सुरेखा शेटगांवकार आनी हेर हाजीर आशिल्लीं. सरपंच विलास मोरजे हांणी सगल्यांक येवकार दिलो. पंचायत सचिव धावुस्कार हांणी फाटले सभेचो इतिवृत्तांत वाचून दाखयलो.
हे ग्रामसभेंत तुकाराम शेटगांवकार आनी गोविंद पोके ह्या दोन ग्रामस्थांनी लेखी स्वरूपांत प्रस्न थाराव सादर केल्लो.
तुकाराम शेटगांवकार हांणी आपल्या लेखी थारावांत, जी पंचायत ग्रामसभेंत थाराव मांडटा, ताची कार्यवाही जाता काय ना? ते संबंदीत खात्याकडेन पावयतात काय ना? असो प्रस्न केलो तेन्ना पंचायत सचीव धावसकार हांणी, दरेक थाराव संबंदीत खात्याक धाडटा. तशे तरेची रिसिप्ट आमचे कडेन आशिल्ल्याचें तांणी स्पश्ट केलें. मरडी वाड्यार गटार वेवस्था नाशिल्ल्यान लोकांच्या घरांनी उदक वता ते सुवातेर गटार वेवस्था उबारची अशी मागणी तुकाराम शेटगांवकार हांणी केली. तशेंच मोरजी पंचायत वाठारांत कितलीं दुकानां, कितलीं हॉटेलां, कितले सलून, वेवसाय कितले जाण करतात? हाचो तपशील सादर करचो अशी मागणी केली.
रस्त्याचे कुशीकच्या व्हाळांत, मार्केट वाठारांत व्हड प्रमाणांत गार्बेज पातळ्ळ्या. ती कित्याक उखलनात? असो प्रस्न तुकाराम शेटगांवकार हांणी उक्तायलो.
गोविंद पोके हांणी खिंड हांगच्या व्हाळाचें काम अर्दवट परिस्थितीन कित्याक? मानशेचीं दारां पक्कीं कित्याक उबारिनात? असो प्रस्न लेखी निवेदनांत हाजीर केलो. ताचेर सरपंच विलास मोरजे हांणी, जलसिंचन खात्याच्या अधिकार्यांक घेवन वाठाराची पळोवणी करून ते सुवातेर पक्कीं दारां आनी हेर कांय समस्या, आडखळी आसल्यार त्यो सोडयतले, अशें आस्वासन दिलें.
मोहन नागवेंकार हांणी, गावडे वाड्यार मुखेल रस्त्यार स्पिडब्रेकर उबारपाची मागणी केली. मोरजेचे रस्ते रुंद केले, डांबरीकरण केलें, तरी कांय स्टॉल कपडे विक्रेते सरळ रस्त्यार अतिक्रमण कित्याक करतात? तांचेर कारवाय केन्ना जातली? असो प्रस्न ग्रामस्थांनी केलो.
रस्त्याचें डांबरीकरण आनी रुंदीकरण करतना कांय व्हाळ पुरोवपाचेय यत्न जाले. हाका लागून पावसांत दोंगरावेलें उदक कशें वतलें? असो प्रस्न केलो.
मांद्रेंचो कोयर मोरजे, तेमवाडो वाठारांत हाडून कित्याक उडयतात? असो प्रस्न मोरजे हांणी उक्तायलो. जाल्यार ताका प्रतिप्रस्न दीपक शेटगांवकार हांणी हाजीर करून मांद्रेंची गार्बेज मांद्र्यांच दवरची. मोरजे हाडून डम्पिंग करचें न्हय, अशी मागणी केली. ताचेर सरपंच विलास मोर्जे हांणी आपूण कंत्राटदाराक आमंत्रीत करून विचारपूस करता अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
