भांगरभूंय | प्रतिनिधी
पेडणें: मोरजी सरपंचपदार विलास नकुल मोरजे हांची विरोधाविणें निवड जाली. तोंडी करारा प्रमाण सरपंच पवन मोरजे हांणी पदाचो राजिनामो पंचायत संचालया कडेन सादर केल्लो. तो स्विकारले उपरांत हें पद रितें आशिल्लें. सरपंच वेंचपाक आयज २९ तारखेर मोरजी पंचायत कार्यालयांत पंचायत मंडळाची बसका जाली. तेन्ना सरपंचपदा खातीर विलास मोरजे हांचो एकूच अर्ज आयिल्ल्यान तांची निवड विरोधाविणें जाली.
ह्या वेळार उपसरपंच सुप्रिया पोके, आदली सरपंच सुरेखा अमित शेटगांवकार, आदले सरपंच मुकेश गडेकार, आदले सरपंच मंदार पोके, फोटू शेटगांवकार आनी हेर पंच हाजीर आशिल्ले.
दर्यादेग वाठारांतल्यो समस्या आनी मोरजी गांवां खातीर स्मार्ट लायब्ररी उबारतले, अशें नवे सरपंच विलास मोरजे हांणी सांगलें. पर्यटन हंगाम आतां बेगीनूच सुरू जातलो. दर्यादेग वाठारांत देशी- विदेशी पर्यटक येतात. त्या पर्यटकांची वेवस्था करपाक मोबायल टॉयलेट दर्यादेगांचेर उबारतले. तशेंच पार्किंगची वेवस्था सरकाराच्या माध्यमांतल्यान करतले. मोरजे स्मार्ट वाचनालय बेगीनूच सुरू करतले. नुस्तें मार्केट कॉम्प्लेक्सा कडेन दीनदयाळ येवजणे खाला प्रकल्प उबारतले. मोरजे भौशीक मसंडभूंयेचो विशय सध्या न्यायालयांत आसा, पूण तोय विशय कायमस्वरूपी सोडयतले, अशें तांणी म्हणलें.
वेंचणूके वेळार स्वप्निल शेटगांवकार हे पंच वांगडी हाजीर रावूंक नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
