भांगरभूंय | प्रतिनिधी
पेडणें: मोरजे पंचायत वाठारांत बँक ऑफ बरोडा व्हाया पंडिर ते खिंड मेरेन एक परंपरीक व्हाळ आसा. हालीं पंडीर वाड्याचेर ह्या व्हाळांत व्हडा प्रमाणांत कोयर, घाणयारें उदक साचिल्ल्यान भलायकेची समस्या निर्माण जावपाचो भंय नागरिकांनी उक्तायला. भलायकी खात्यान हाचे कडेन लक्ष दिवन हाचो तपास करचो आनी संबंदितांचेर कारवाय करची अशी मागणी जाता.
व्हाळ, पोंय पावसाचें उदक वचपा खातीर आसतात. मात कांय जाणां जांचीं घरां दुकानां, आस्थापनां ह्या व्हाळ, पोंयचे वटेन आसता ते वेवसायीक, घर धनी ह्या व्हाळांत कोयर, घाणयारें उदक उडयतात. ह्या व्हाळांत उदक सांठून उरलां, ताका लागून भलायकेची समस्या निर्माण जावपाक शकता. डेंगू मलेरिया सारक्या दुयेंसांक आमंत्रण दिवपा खातीर हो व्हाळ सज्ज आसा काय कितें? असो भंय नागरिकांनी उक्तायला.
पंचायत मंडळांन जे कोण ह्या व्हाळांत घाणयारें उदक सोडटात तांकां पयलीं शिटकावणी दिवची. मात परत अशे तरेच्यो घडणुको घडल्यार कायदेशीर कारवाय करची अशी मागणी लोक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
