भांगरभूंय | प्रतिनिधी
पेडणें: मोरजेच्या वयल्या वाड्यावेल्या उमाकांत खोत ह्या ६४ वर्सां पिरायेच्या ज्येश्ठ नागरिकाचो जमीन वादांतल्यान खून जावन पंदरा दीस जाले. तरी मुखेल दुबावीत आजूनय मांद्रें पोलिसांक मेळूंक ना. मात जे तीन दुबावीत मेळिल्ले तांकां परत न्यायालया सामकार हाजीर केले तेन्ना तांकां १४ दिसांची न्यायालय बंदखण दिली. ते सध्या जामीना खातीर गेल्ल्याची म्हायती उपलब्ध जाल्या.
मोरजेच्या वयल्या वाड्यावेले उमाकांत खोत ह्या ६४ वर्सां पिरायेच्या ज्येश्ठ नागरिकाचो जमीन वादांतल्यान खून केलो. मांद्रें पुलिसांनी वट्ट चार जाणांचेर गुन्यांव नोंद केल्लो. तांतलो लोकेश पुत्ता स्वामी (५३), रोहित कुमार प्रजापती (२०, झारखंड) आनी विजय ससुप्पन (३६) हांकां अटक केली. मात मुखेल दुबावीत जांणी जमीन विकत घेतली ते जमनीचे धनी अशोक कुमार नंदुरुमली हांकां आजूनय अटक करपाक मांद्रें पुलिसांक अपेस आयलां. तिगूय दुबावितांची १४ दिसांची बंदखण सोंपले उपरांत तांकां परत न्यायालया मुखार हाजीर केले तेन्ना तांचे बंदखणींत आनीक १४ दिसांची वाड केल्या.
मजगतीं, ह्या तिगृन दुबावितांक जामीन मेळचो म्हणून अर्ज सादर केल्ल्याची म्हायती उपलब्ध जाल्या.
पंदरा दिसांचो कार्यकाळ गेलो तरी माद्रें पोलिसांक आजूनय मुखेल दुबावीत कित्याक मेळना? हो एक संशोधनाचो विशय जाता अशी चर्चा सध्या चालू आसा. उमाकांत खोत हांकां मारपेट करात, अशें दुबावितान फोना वरवीं सांगिल्ल्याची म्हायती सुत्रांनी दिल्ली
मोरजी पंचायत मंडळाची कार्यवाही आतां
मोरजी पंचायतीची ग्रामसभा २३ तारखेर सरपंच विलास मोरजे हांचे अध्यक्षते खाला जाल्ली. तेन्ना उमाकांत खोत हांच्या खून विशीं विशय ग्रामसभेंत आयलो तेन्ना सरपंच विलास मोरजे हांणी म्हायती दितना ज्या तिनूय दुबावितांक पुलिसांनी धरल्यात, जो मुखेल आरोपी आसा. ताकाय धरून सरकारान कारवाय करची, अशी मागणी तांणी केली. पंचायती वरवीं जे बेकायदेशीर रस्तो केला, तो कायदेशीर रस्तो कारून जमीन पयलींच करले अशें सरपंच विलास मोरजे हांणी म्हणलें.
मांद्रें पुलीस निरीक्षक गिरेन्द्र नायक हांचे कडेन संपर्क सादलो तेन्ना मुखेल दुबाविताच्या सोदांत पुलीस टीम कार्यरत आशिल्ल्याचें तांणी सांगून दुबाविताक बेगीनूच धरतले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
