भांगरभूंय | प्रतिनिधी
गोंयच्या मुंबय उच्च न्यायालयान काडली अपमान याचिका निकालांत
पणजी : मोरजी-पेडणेंचे जमनीचो मसंडभूंय म्हूण वापर केल्ल्याच्या प्रकरणांत पर्यटन संचालनालयान बिनशर्त माफी मागिल्ल्यान गोंयच्या मुंबय उच्च न्यायालयान तांचे आड अपमान याचिका निकालात काडल्या. पर्यटन संचालकांनी हे जमनी खातीर दिल्लें ना हरकत प्रमाणपत्र फाटीं घेतिल्ल्याची नोंद न्यायालयान घेतली आनी ताका लागून अपमान रद्द जाल्ल्याचें म्हणलां. मात ह्यान फुडें कसलेय परिस्थितींत संबंदीत प्राधिकरणां कडल्यान योग्य परवानगी घेतले बगर १३ मार्च २०२४ च्या निकालांत नमूद केल्ले जमनीचो वापर मसंडभूंय म्हणून करचो न्हय, अशी खरपणान न्यायालयान सगल्या प्राधिकरणांक म्हणलां.
जीसीझेडएमए आनी पंचायतीन दिलें स्पश्टीकरण
तांणी फकत जैवीक आडो घालपा खातीर अर्ज मंजूर केल्लो, मात मसंडभूंये खातीर कसलीच परवानगी मागूंक नाशिल्ली. हाका लागून अशे तरेच्या अर्जांचेर विचार करपाचो प्रस्नूच येना अशें गोवा कोस्टल झोन मॅनेजमेंट अथॉरिटी (जीसीझेडएमए) न न्यायालयाक सांगलें.
ह्या प्रकरणांत मोरजी ग्रामपंचायतीच्या सचिवांनी एक प्रतिज्ञापत्र सादर केलें. तातूंत न्यायालयाचो खंयचोय आदेश मोडूंक ना आनी अपमान जावंक नाशिल्ल्याचें म्हणलां. ह्या प्रतिज्ञापत्रांत क्षेत्रीय सर्वेक्षकाच्या अहवालाचो आनी एके घडणुकेचो उल्लेख आसा. जाचेवेल्यान पेडणें पुलीस स्टेशनांत गुन्यांव दाखक केल्लो. न्यायालयान ह्या प्रतिज्ञापत्राची नोंद घेतल्या.
३० जुलय २०२५ तारखेर उच्च न्यायालयान १३ मार्च २०२४ आनी २१ जून २०२४ तारखेर दिल्ल्या आदल्या निर्देशांचेर आदारीत सविस्तर आदेश जारी केल्लो. तातूंत पर्यटन संचालनालय आनी जीसीझेडएमए खातीर विशिश्ट सुचवण्यो आशिल्ल्यो. आता माफी स्विकारिल्ल्यान आनी ना हरकत प्रमाणपत्र फाटीं घेतिल्ल्यान अपमानाचो भाग सोंपला जरी आसलो तरी फुडाराक हे जमनीचो कसलेय तरेचो वापर करतना योग्य कायदेशीर प्रक्रिया खरपणान पाळपाक जाय, हाचेर न्यायालयान भर दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
