भांगरभूंय | प्रतिनिधी
पेडणें, प्रतिनिधी : मोरजी पंचायत वाठारांतल्या कान्नायकवाडो वाठारांत १२९ कुडींची सात मजली इमारत येता. तेच हॉटेल इमारतींत कॅसिनो सुरू करपाचो विचार चलता. मोरजे पंचायतीचे आयज जाल्ले ग्रामसभेंत गांवकारा्ंनी कॅसिनोक विरोध करपाचो थाराव मंजूर केलो. हो थाराव आपूण संबंदीत खात्याक धाडटलों अशी म्हायती ह्या वेळार सरपंच पवन मोरजे हांणी दिली.
विनोद पेडणेंकार, विकी जोशी, मयूर शेटगांवकार, भालचंद्र टेंबकार श्या जायत्या जाणांनी ग्रामसभेंत हो प्रकल्प नाका अशें सांगलें. उपरांत सगळ्या ग्रामस्थांनी कॅसिनोक विरोध करीत हो थाराव मंजूर करपाक संमती दिली. ग्रामसभा सरपंच पवन मोरजे हांचे अध्यक्षते खाला जाली. ह्या वेळार उपसरपंच सुप्रिया पोके, पंच रजनी शिरोडकार, पंच मुकेश गडेकार, विलास मोर्जे, मंदार पोके, फटू शेटगांवकार ,सुरेखा शेटगांवकार, स्वप्निल शेटगांवकार आनी हेर गांवकार हजर आशिल्ले. सुरवातेक सचिन कवठणकार हांणी येवकार दिलो आनी फाटलें इतिवृत्त वाचून दाखयलें.
हांगा उबी जावपी इमारतींत कॅसिनो जाता. थंय श्री काळोबा देवस्थान वाठारूय आसा. ही सुवात एके भायले कंपनीन विकत घेतल्या. गांवांत व्हड इमारतींक परवानगी दिवची न्हय. दिल्या, ती फाटीं घेवची, अशी मागणी ग्रामस्थांनी केली आनी तशे तरेचो थारावूय मंजूर केलो.
श्री काळोबा देवस्थान वाठारांत मेगा प्रकल्पा खातीर परवानगी कोणें दिली? थळाव्यांक पंचायत आनी सरकारान विस्वासांत घेतलां काय? मोरजी पंचायतीन सात मजली इमारत बांदपाक कसले परवाने दिल्यात? अशे प्रस्न गांवकारांनी विचारले. हांगां हॉटेल उबारले उपरांत कसली ना कसली समस्या निर्माण जातली. ती कशे सोडयतले, अशें सांगून मोरजी गांवात असलो प्रकल्प नाकाच, अशी भूमिका गांवकारांनी घेतली.
मयूर शेटगांवकार हांणी सांगलें, मोरजी गांवाक कितलें उदक जाय? गांवांत तितलें उदक मेळटा काय? अशें विचारून उदक मेळना जाल्यार मेगा प्रकल्प हाडचे पयलीं पंचायत गांवच्या लोकांक विस्वासांत कित्याक घेना? जर उदक ना जाल्यार व्हडा प्रकल्पांक पंचायत मंडळान ग्रामस्थांक विस्वासांत घेनासतना परवानगी कशी दिली. मेगा प्रकल्प हाडचे पयलीं गांवकारांची बसका कित्याक घेवंक ना असो प्रस्न करून असल्या प्रकल्पांक थारो दिवचो न्हय अशी मागणी केली.
सरपंच पवन मोरजे हांणी, सरकाराच्या मंडळान हे इमारतीक परवानो दिला. मात हे इमारतींत कसलेच तरेच्या कॅसिनोक मोरजे पंचायतीन परवानो दिवंक ना. ताका लागून मोरजे पंचायतीच्या सगळ्या पंच वांगड्यांचो कॅसिनोक पुरायेन विरोध आशिल्ल्याचें स्पश्ट केलें.
तेमवाडो दर्यादेग वाठारांत शापोरा न्हंयचे देगेर परंपरीक वाट आशिल्ली. व्हडीं पार्क करपाक सुवात मेळटाली. हो प्रस्न अजून कित्याक सुटावो जावंक ना? अशें विनोद पेडणेकार हांणी विचारलें. मयुरेश शेटगांवकार हांणी ताका तेंको दिलो. जी आदल्या काळांतली परंपरीक पांयवाट आशिल्ली ताची आनी पार्कींगची वेवस्था पंचायतीन सोडोवची अशी मागणी मयूरी शेटगांवकार हांणी केली. ते सुवातेर सीआरझेड नेम मोडून बांदिल्लीं बांदकामां आजूनय उबीं आसातूच कशीं असो प्रस्न शेटगांवकार हांणी केलो. तेन्ना सरपंच पवन मोरजे हांणी ह्या बांदकामाक परवाने हंगामी स्वरूपाचे दिल्ल्याचें स्पश्ट केलें. तेन्ना मयूरी शेटगांवकर हांणी हीं बांदकामां आतां पक्की जाल्ल्याचो दावो केलो.
पवन मोरजे हांणी टेंबवाडो शापोरा न्हंयेचे देगेर आशिल्ली परंपरीक पांय वाट आनी व्हडीं पार्क करून दवरपाक सुवात आरक्षीत करपाक थळाव्यांक विस्वासांत घेवन हो विशय सोडयतले अशी गवाय दिली.
टेंबवाड्यावेल्या टर्टल हॉटेलांतल्यान व्हडा प्रमाणांत घाणयारें उदक सोडटात. ताचेर कसली कारवाय करतले असो प्रस्न लोकांनी हाजीर केलो तेन्ना सरपंच मोरजे हांणी आपूण संबंधितांची आनी ग्रामस्थांची एक बसका घेवन फुडली कारवाय करतलों अशी गवाय दिली.
सीआरझेडान थळाव्यांक मुभा दिवची
ह्या वेळार ग्रामस्थ जेम्स हांणी दर्यादेग वाठारांत जीं परंपरीक घरां आसात, तीं दुरुस्त करून कांय नागरिकांनी वेवसाय सुरू केल्यात. मात सीआरझेड विभागांतल्यान वेवसायीक कामा करप्यांचेर कारवाय करपाचो कायदो केला. जे थळावे परंपरीक रितीन ज्या घरांत रावतात थंय सीआरझेडान घर दुरुस्ती, विस्तारित बांदकाम करून आनी थंय वेवसाय करपाक परवानगी दिवची अशी मागणी नागरिकांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
