भांगरभूंय | प्रतिनिधी
पेडणें: मोरजी पंचायतीची ग्रामसभा सरपंच विलास मोरजे हांचे अध्यक्षतेखाला जाली. ह्या वेळार मोरजे पंचायत वाठारांतली परंपरीक पांयवाट आसात. त्यो आडोवपाचो यत्न जाता. त्यो मेकळ्यो करप, दर्यादेग वाठारांत लाकडी खांटी उदका लागसार घालून अतिक्रमण करतात, तांचेर कारवाय करची. गार्बेज प्रस्न, घर टॅक्स वेळार वसूल करप, नवीं घरां उबारतात, कोण घरां बिराडाक दिता जाल्यार तांचे कडल्यान घरपट्टी वेळार वसूल करप, कर्मचारी कार्यालयांत वेळार येनात तांकां समजावप, अश्या खुबश्या विशयांचेर चर्चा जाली.
मोरजेचे ग्रामसभा सरपंच विलास मोरजे हांचे अध्यक्षते खाला मोरजे पंचायत सभाघरांत आयोजीत केल्ली. ह्या वेळार उपसरपंच सुप्रिया पोके, पंच रजनी प्रकाश शिरोडकार, पंच सुरेखा शेटगांवकार, पंच फटू शेटगांवकार ,पंच मुकेश गडेकार, पंच स्वप्नील शेटगांवकार, पंच मंदार पोके, पंचायत सचीव सचिन धावुस्कर आनी ेर हाजीर आशिल्ले.
हे ग्रामसभेक ग्रामस्थांचो उणो प्रतिसाद मेळ्ळो. तुकाराम शेटगांवकार ह्या नागरिकांन एकूच लेखी स्वरूपांत प्रस्नांचो अर्ज सादर केल्लो. सुरवातेक सरपंच विलास मोर्जे हांणी सगल्यांक येवकार दिलो. पंचायत सचिव सचिन धावुस्कार हांणी फाटले ग्रामसभेचो इतिवृत्तांत वाचलो.
ह्या वेळार तुकाराम शेटगांवकार हांचो एकूच लेखी अर्ज ग्राम सभे मुखार आयलो. तेन्ना तुकाराम शेटगांवकार हांणी मोरजी पंचायत क्षेत्रांतल्या कचर्यांची समस्या गंभीर जाल्ल्यान कोयर कशे तरेचो उबारतात, तातुंतल्यान कितलो महसूल येता? असो प्रस्न हाजीर करून हे विशीं सविस्तर म्हायती दिवपाची मागणी केली. तशेंच रस्त्या कुशीक जे वाहनां पार्क करून येरादारी कोयंडी करतात, रस्ते रुंद करतात. मात हे रस्ते वाहनां खातीर कायमस्वरूपी पार्किंग वेवस्थे खातीर आसतात काय? असो प्रस्न करून पंचायतीन, येरादारी खात्याने फुडारकार घेवन रस्त्यार ‘नो पार्कींग’ तखटे लावचे, अशी मागणी केली.
ह्या वेळार सरपंच विलास मोरजे हांणी जाप दितना, पत्रकार निवृत्ती शिरोडकार हांचे हाजेरींत ट्राफिक अधिकार्यांची एक म्हत्वाची बसका फाटलय दोन दिसां आदीं घेतिल्ली. तेन्ना रस्ते रुंदीकरण पुराय जाले उपरांत भौशीक बांधकाम खातें रस्ता विभाग जातूंत रस्त्याच्या कुशीक नो पार्किंग झोन नोटिफिकेशन जाहीर केलां. ते सुवातेर नो पार्किंग तखटो लावन लेगीत जे वाहनां पार्क करतात, तांचेर कारवाय करतले, अशें सरपंच विलास मोरजे हांणी जाप दिली.
गार्बेज विशंीं समस्या आनीहेर जे प्रस्न आसात ते विशीं फाटल्या दोन दिसांची समिती बसका आयोजीत केल्ली तेन्ना ताचेर सविस्तर चर्चा जाल्या. जंय गार्बेज उडयता थंय सीसीटीव्ही कॅमेरे बसयता अशी म्हायती सरपंच विलास मोरजे हांणी दिली.
तुकाराम शेटगांवकार हांणी आपल्या वाड्यार फाटल्या कितल्या वर्सा सावन परंपरीक पांयवाट आशिल्ली. पांयवाट आडायल्या ती मेकळी करची, अशी मागणी केली. हाचेर सरपंच विलास मोर्जे हांणी जाप दितना, मोरजी पंचायत वाठारांत कांय परंपरीक पांयवाडो आसात. आनी त्यो आडावपाचो प्रकार सुरू आसा. त्यो पांयवाटो मेकळ्यो करपाची कार्यवाही करतले. अशें आस्वासन तांणी दिलें.
सोनू शेटगांवकार हांणी आपल्या घराच्या वाठारांत एक बिगर गोंयकार रेस्टॉरंट चलयता, तो रातचो आवाजाचें प्रदुशण केल्ल्यान आमकां ताचो त्रास जाता. हाचेर पंचायतीन कारवाय करपाची तांणी मागणी केली. तशेंच विठ्ठलदास वाडो मोरजी दर्यादेग वाठारांत जी परंपरीक पायवाट आसा. त्या पायवाटेर पर्यटक आनी नागरिकूय वाहनां पार्क करून वाट आडोवपाचो यत्न करतात, ती पांयवाट मेकळी करची, अशी मागणी केली.
केरकार हांणी ह्या वेळार दर एका वर्सा ग्रामसभेंत जिल्लो पंचायत वांगडी आनी आमदार हांकां आमंत्रित करून पंचायत वाठारांत जे व्हड प्रकल्प जातात, त्या प्रकल्पाविशीं चर्चा करची आनी आमदार, जिल्हो पंचायत वांगड्या कडल्यान मोरजी पंचायत वाठाराचे उदरगतीक हातभार लावपाची मागणी केली.
सुभाष शेटगांवकार हांणी, जे कोण घर टॅक्स वेळार भरिनात तांणी घर टॅक्स वेळार भरचे. तशेंच भाडेपट्टीर दितात तांचे कडल्यानूय महसूल एकठांय करचो. तशेंच फाटल्या ४५ वर्सां सावन मरडी वाड्यार जी आदलीं उदकाचीं पायपां आसात तीं बदलून नवीं घालून नेमान उदकाची वेवस्था करची, अशी मागणी सुभाष शेटगांवकार हांणी केली.
गोविंद पोके हांणीय ज्यो कांय परंपरीक पांयवाटो बंद करपाचो प्रकार घाडला त्यो मेकळ्यो करून नागरिकांक थाकाय दिवची, अशी मागणी केली.
दीपक शेटगांवकार हांणी मोरजी पंचायत वाठारांतल्यो गार्बेज समस्या दिवसान दीस गंभीर जाता. ताची खरसाण पंचायत मंडळांनी वळखून ताचो वेवस्थीत विलो लावपाची सुचवणी केली.
निमाणें पंच मुकेश गडेकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
